“بيڊل جي آکاڻين” ۽ عام ماڻھن وارين (مگلس) آکاڻين ۾ ٻيو چٽو فرق اھو آھي ته ھنن آکاڻين جون جادوگرياڻيون انساني آکاڻين جي ھيروئين جي ڀيٽ ۾ پاڻ ئي پنهنجي قسمت ڳولھڻ نڪري پونديون آھن. آشا، الٿيڊا، اماتا ۽ بيبٽي ريبٽي اھڙيون جادوگرياڻيون آھن، جيڪي سالن تائين سمھي ڪنهن شھزادي جو اڇو جوتو ڳولھي ڏيڻ بدران پنهنجي قسمت پنهنجن ئي ھٿن ۾ کڻن ٿيون. سواءِ ھڪڙي آکاڻي “مھا جادوگر جي وارن واري دل ” جي جنهن ۾ بنا نالي واري ڇوڪري عام ماڻھن وارين ڪھاڻيءَ جي شھزاديءَ جيان عمل ڪري ٿي، پر ھن آکاڻيءَ جي پڄاڻي سدائين واري خوشگوار زندگيءَ تي نٿي ٿئي.
بيڊل دي براڊ پندرھين صديءَ جو شاعر ھو، پر سندس زندگيءَ جو وڏو حصو پرسراريت جي ڪفن ۾ دفن ٿيل آھي. اسان کي اھا خبر آھي ته ھو يارڪشر ۾ پيدا ٿيو ھو ۽ سندس ھيڪلي بچيل ڪاٺي جي پتلي مان ڄاڻ ملي ٿي ته ھن کي وڏي ڏاڙھي ھئي. جيڪڏھن سندس آکاڻيون صحيح معنيٰ ۾ سندس سوچ جي عڪاسي ڪن ٿيون ته پوءِ کيس عام ماڻھن (مگلس) سان پيار ھو ۽ سندس نظر ۾ اھي بدنيت بدران اڻڄاڻ آھن. کيس ڪاري جادو ۾ ويساھ نه ھو ۽ سندس مڃڻ ھو ته جادوگرن ۾ جنونيت، نفرت ۽ اڻڄاڻائي جھڙا جذبا سندن صلاحيتن کي غلط نموني استعمال ڪرڻ سبب پيدا ٿيندا آھن.
سندس آکاڻين جا ڪردار جيڪي سرخرو ٿيندا آھن، اھي نه ھوندا آھن جن وٽ تمام گھڻي جادو واري طاقت ھجي، پر اھي جيڪي رحم دل، عقل فھم وارا ۽ ھوشيار ھوندا آھن.
اھڙا ئي ساڳيا خيال رکندڙ اڄوڪي دور جو ھڪ اھم جادوگر پروفيسر ايلبس پرسيول ولفرڪ برين ڊمبلڊور آھي، جيڪو آڊر آف مرلين (فرسٽ ڪلاس) ھاگورٽس اسڪول آف وچ ڪارفٽ اينڊ وزرڊري جو ھيڊ ماستر، جادوگرن جي بين الاقوامي ڪنفيڊريشن جو سربراھ ۽ وزنگاموٽ جو وڏي ۾ وڏو جادوگر آھي. انهيءَ جي ڪري ئي شايد ھاگورٽس جي آرڪائويز مان ڊمبلڊور جي وصيت سان گڏ ھنن آکاڻين تي سندس تبصرا پڻ مليا آھن. اھو ثابت نه ٿي سگھيو آھي ته اھي تبصرا ھن جي پنهنجي اطمينان لاءِ ھئا يا ھنن آکاڻين جي ڪتاب جي ايندڙ شماري لاءِ، ۽ ان جي اسان کي ھاڻي ڪڏھن به خبر ڪانه پئجي سگھندي.
پر ان ھوندي اسان کي ھاگورٽس جي ھاڻوڪي ھيڊ ماسترياڻي پروفيسر مائنريوا ميگونل ھن شماري جنهن ۾ ھرمائني گرنجر نئين انداز ۾آکاڻين کي ترجمو ڪيو آھي، جن ۾ پروفيسر ڊمبلڊور جي تبصرن کي ڇاپڻ جي خاص اجازت ڏني آھي.
اسان کي اميد آھي ته پروفيسر ڊمبلڊور جا تبصرا، جن ۾ سندس جادو جي تاريخ بابت مشاھدو، ذاتي تجربا ۽ آکاڻين تي سندس ڄاڻ ڀريا رايا، ٻنهي جادوگرن ۽ عام ماڻھن (مگلس) پڙھندڙن جي ايندڙ نسلن کي “بيڊل دي براڊ جون آکاڻيون” پڙھن لاءِ اتساھ ڏيندا. اھي سڀ جيڪي پروفيسر ڊمبلڊور کي سڃاڻيندا ھئا، انهن جو مڃڻ آھي ته ھن ڪتاب جي اجوري وارا پيسا امداد طور چلڊرنس ھاءِ ليول گروپ نالي ڀلائي واري اداري، جيڪو ٻارن جي ڀلائي لاءِ ھڪ سگھارو آواز آھي، کي ڏيڻ تي پرفيسر ڊمبلڊور کي خوشي ٿئي ھا.
ھتي پروفيسر ڊمبلڊور جي تبصرن تي ھڪ ننڍڙي راءِ ڏيڻ ضروري سمجھجي ٿي. جيستائين اسان جي ڄاڻ آھي ته ھي تبصرا، ھاگورٽس جي فلڪيات واري برج تي پيش ايندڙ ڏکائيندڙ واقعن کان رڳو 18 مھينا اڳ پورا ڪيا ويا ھئا. اھي جيڪي جادو واري دنيا جي ويجھڙ ۾ ٿيل جنگ جي تاريخ کان واقف آھن (مثال طور جن ھيري پوٽر جي زندگيءَ بابت سمورا ست ڪتاب پڙھيا آھن) سمجھي ويندا ته ھن ڪتاب جي آخري آکاڻي بابت پروفيسر ڊمبلڊور سندس ڄاڻ کان گھٽ شيون ظاھر ڪيون آھن، شايد انهيءَ جو ڪارڻ اھو ئي جملو آھي، جيڪو ھن ڪيئي سال اڳ سندس سڀ کان پياري شاگرد کي چيو ھو:
“اھا خوبصورت ۽ خطرناڪ شيءِ آھي، ان ڪري ان کي وڏي احتياط سان استعمال ڪجي.”
اسين ڀلي ھن سان اتفاق ڪريون يا نه، پر اسين پروفيسر ڊمبلڊور جي اھا ڳالھ معاف ڪريون ٿا ته ھن ايندڙ پڙھندڙن کي انهن غلط خواھشن کان پري رکڻ جي ڪوشش ڪئي آھي، جن جو شڪار ھو پاڻ ٿيو ۽ جنهن جي کيس ايڏي قيمت ڏيڻي پئي.
ڪيوڊچ راند:
“هيري پوٽر جي دنيا ۾ هي جادوگرن ۽ جادوگرياڻي جي مشهور راند آهي. پهرين سال ۾ ئي اهو ڏيکاريو ويو آهي ته هيري پوٽر ۾ سيڪر ٿيڻ جون سڀ خوبيون موجود آهن ڇو ته هن جو پيءُ به ان راند ۾ سيڪر هو. پوٽر دنيا جو اهم ڪردار ايلبس ڊمبلڊور ان حوالي سان هڪ هنڌ ڄاڻائي ٿو ته:
ڪيوڊچ زندگيءَ جي سڀني شعبن سان لاڳاپيل جادوگرن ۽ جادوگرياڻين کي گڏ ڪندي آھي. اھا اسان کي پنھنجي ڏکن سکن، کٽڻ ھارائڻ ۽ (انھن لاءِ جيڪي چڊلي ڪيننس جا حمايتي آھن) محرومين کي ٻين سان ونڊڻ جو موقعو ڏيندي آھي.”
هي راند اڏامندڙ ٻُهارن تي هوا ۾ کيڏي ويندي آهي، جنهن ۾ ٽن قسمن جا مختلف بال استعمال ڪيا ويندا آهن ۽ هر بال جون الڳ الڳ پوائنٽون ملنديون آهن. جڏهن ته گولڊن سنچ نالي بال کي جنهن به ٽيم جي سيڪر پڪڙي ورتو ته اها ٽيم راند کٽي ويندي ۽ ان جي قابو ۾ اچڻ سان راند اتي بند ڪئي ويندي آهي.
هيري پوٽر جي دنيا جي حوالي سان اهو چئي سگهجي ٿو ته ان جا الڳ ئي رنگ آهن ۽ ڪجهه نقادن جو خيال آهي ته فينٽسي ادب جيتري مشهوري هيري پوٽر ۾ جوڙيل دنيا کي ملي آهي، ايتري مشهوري شايد ئي ٻئي ڪنهن فينٽسي ادب ۾ ٻڌايل دنيا کي ملي آهي.
( پورو ٿيو)
