هي ڊرامو نيويارڪ ٽائمز جي بيسٽ سيلر لسٽ تي چئن مهينن کان وڌيڪ رهندڙ ناول”Roots: The Saga an American Family” تي ٺهيل آهي. جنهن جون 60 لک کان وڌيڪ ڪاپيون وڪرو ٿيون ۽ 35 کان وڌيڪ ٻولين ۾ هن وقت تائين هي ناول ترجمو ٿي چڪو آهي. ناول نگار ايلڪس هيلي (Alex Haley) کي هن ناول تي پلٽزر پرائيز پڻ مليو. روٽس آمريڪي ٽيليويزن سيريز تي ٻڌل آهي. هي سيريز پهريون ڀيرو ABC تي 1977ع ۾ نشر ٿي. جنهن تي 6.6 ملين خرچ آيو ۽ ساڳي ئي نالي سان هسٽري چينل تي 1977ع ۾ هن سيريز جو ريميڪ ٺاهيو ويو، جيڪو پهريون ڀيرو 2016ع ۾ نشر ٿيو ۽ جنهن تي ڪل لاڳت 50 ملين ڊالر آئي.
هن تاريخي ناول جي ڪهاڻي تي هي مني سيريز هسٽري چينل پاران چئن حصن ۾ ٺاهي وئي آهي، جنهن جي ھر قسط تقريبن نوي منٽن جي آهي. هن ناول ۾ اهو پيغام ڏنو ويو آهي ته غلامي ڇا ٿيندي آهي ۽ ماضي ۾ غلام ڪيئن رکيا ويندا هئا، جن جا نالا انهن جا آقا کانئن کسي ڇڏيندا هئا. غلام ڇوڪرين کي ڪيئن گورا انگريز پنهنجي جنسي حوس لاءِ استعمال ڪندا هئا، انهن سان ڪهڙو سلوڪ ڪيو ويندو هو ۽ انهن کي ڪيئن وڪڻندا هئا. جيڪڏهن ڪو ڀڄڻ جي ڪوشش ڪري ته ان تي ڪيڏا نه ظلم ڪيا ويندا هئا. اهو سڀ هن مني سيريز ڊرامي ۾ ڏسڻ لاءِ ملي ٿو.
هي ناول هڪ آفريڪي جوان ڇوڪري جي ڪهاڻي آهي، جيڪو پنهنجي ننڍڙي ڳوٺ جفوري کان ٻاهر نڪري دنيا ۾ ڪو وڏو ڪم ڪرڻ چاهي ٿو. پڙهڻ چاهي ٿو پر هن جي اميدن تي ان وقت پاڻي ڦري وڃي ٿو، جڏهن اهو ڪڪو وڏو ڪم ڪرڻ لاءِ گهران نڪري پئي ٿو ۽ رستي ۾ پنهنجي محبوبا سان ملي ٿو. اتي هن کي ڪجھه غنڊا ڏسي وٺن ٿا، جيڪي سندس پيءُ جا دشمن هوندا هئا. ڇو ته سندس پيءُ هڪ بهادر ماڻهو هو ۽ غلامن کي آزاد ڪرائيندو هو ۽ هنن غنڊن کان ان ڪجهھ غلام زبردستي خنجر جي زور تي آزاد ڪرايا هئا، تنهنڪري هنن کي ان ڳالهھ جي اندر ۾ وڏي ڪاوڙ هئي.
انهي بدمعاش غنڊن جو سردار هن کي چوندو آهي ته تنهنجي خاندان مون کي گهڻو رئاڙيو آهي ۽ هاڻي مان انهن کي رت جا ڳوڙها رئاڙيندم. چپ چاپ اسان سان گڏ هل تنهنجي بدلي ۾ ننڍڙو سودو ڪرڻو آهي، پوءِ تون آزاد آهين ۽ ڪُنٽا ڪُنٽي جيڪو هڪ بهادر ۽ دلير ماڻهو آهي، اهو هن فلم جو مُک ڪردار آهي. هو چوندو آهي، آزاد آهيان؟ مان آزاد ئي آهيان ۽ اهو پنهنجي محبوبا کي ڀڄڻ جو چوندو آهي ۽ پاڻ به ڀڄندو آهي پر پڪڙجي پوندو آهي. پوءِ هن تي سخت تشدد ڪيو ويندو آهي ۽ اهي غنڊا جيڪي پنهنجي ڪاري چمڙي واري نيگرو (شيدي) کي ئي پڪڙي گورن انگريزن کي وڪڻندا هئا. انهن کي ڪاوڙ اچي ويندي آهي ۽ اهي چوندا آهن هاڻي هن جو سودو نه ٿيندو، هن کي ٻين قيدين سان گڏ انگريزن کي وڪڻي ٿا ڇڏيون. هن کي ٻيڙيون پارائي ٻين غلامن سان گڏ سامونڊي جهاز ۾ قيد ڪيو ويندو آهي. جتي هنن کي ڪيئن ماريو ويندو آهي، نچايو ويندو آهي ۽ اتي ڪُنٽا ڪنٽي کي پنهنجي محبوبا به نظر اچي ٿي، جيڪا به قيد ڪئي وئي هئي ۽ گورو انگريز حڪم ڏئي ٿو ته هن کي مون وٽ آندو وڃي.
هونئن ڏٺو وڃي ته اسان وٽ به غلامي موجود آهي. جنهن جي شڪل ٿوري گهڻي مختلف آهي. هتي هندن کي نيچ ۽ اقليت سمجهڻ، انهن جي جوان ڇوڪرين کي اغوا ڪرڻ، انهن جو زوري مذهب مٽائي ڇڏڻ، انهن جا نالا مٽائي ڇڏڻ، انهن جو ريپ ڪرڻ، ڇوڪرين کي هيسائي ڌمڪائي چيو ويندو آهي ته جيڪڏهن ڪنهن به جاءِ تي انهن پنهنجو وات کوليو ته سندن سموري خاندان کي قتل ڪيو ويندو.وياج خور غريبن جي سڄي زمين هڙپ ڪري وٺن ٿا ته ڪٿي پيسا نه ڏئي سگهڻ جي ڪري انهن کي پنهنجو نوڪر (غلام) بڻائين ٿا ته ڪٿي وري سڀ کان پهرين پنهنجون زمينون وڏيرو ۽ زميندار سيراب ڪندو. ان کان پوءِ جيڪو پاڻي بچيو ته هاري طبقي کي ڏنو ويندو آهي جيڪڏهن نه بچي ته ڀلي بکيو مري ۽ بک بد بدحاليءَ جي ڪري ماءُ پيءُ پنهنجي جگر جا ٽڪر، پنهنجا ٻار کپائڻ تي مجبور آهن ته ڪٿي زهر کائي سڀ مري ٿا وڃن ته ڪٿي پنهنجي سموري خاندان کي ماري پاڻ کي آخر ۾ ماري ٿا ڇڏين ته ڪٿي غريب روزگار نه هجڻ جي ڪري پنهنجون بڪيون ۽ رت جون بوتلون کپائڻ لاءِ پنهنجي ڳچيءَ ۾ بورڊ وجهي گهمي رهيا آهن ته ڪٿي بک ۽ تنگيءَ جي ڪري ڪوئي پنهنجو جسم وڪڻڻ تي مجبور آهي.
هن مني سيريز ۾ هڪ خاص ڳالھه اها آهي ته فلم جا ڊائيلاگ، اداڪاري، سينيماٽوگرافي، ڪاسٽيومز ۽ ڊائريڪشن تمام ڪمال جا آهن. جيڪي حساس دل ماڻهوءَ کي ضرور رئاڙي ڇڏيندا. وڌيڪ اڳتي ڪُنٽا ڪنٽي سان ڇا ٿو ٿئي، ان لاءِ اوهان کي هي مڪمل فلم ڏسڻي پوندي. هونئن ته مڪمل سيزن ئي لاجواب آهي پر مون کي هن فلم جو هڪ ڊائلاگ تمام گهڻو پسند آيو.
“توهان کي هر روز پنهنجي آزاديءَ جي لاءِ وڙهڻو پوندو ڇو ته هر روز ڪو توهان کان توهان جي آزادي کسڻ جي ڪوشش ڪندو.”
