ڪراچي(اسپورٽس نيوز) آسٽريلوي ڪرڪيٽ ٽيم جي ڪپتان پيٽ ڪمنز چيو آهي ته ميچ نه کٽڻ تي افسوس آهي، پاڪستان سٺي بيٽنگ ڪندي ميچ ڊرا ڪرڻ ۾ ڪامياب ٿي ويو. ڪراچي ۾ ٽيسٽ ميچ ڊرا ٿيڻ کانپوءِ ميڊيا سان ڳالهائيندي آسٽريلوي ڪپتان پيٽ ڪمنز چيو ته پاڪستاني بيٽسمينن جي ڪيچ ڊراپ ڪري موقعو ضايع ڪيو، جنهن تي افسوس آهي. هن چيو ته راند جي ٽئين ڏينهن تائين اسان جا بالرز غالب رهيا پر بابراعظم، محمد رضوان ۽ عبدالله شفيق شاندار بيٽنگ جو مظاهرو ڪندي، ٽيسٽ ميچ ڊرا ڪرڻ ۾ اهم ڪردار ادا ڪيو.
آسٽريلوي ڪپتان اعتراف ڪيو ته ڪراچي ٽيسٽ جي ٽئين ڏينهن ميچ تي سندس گرفت مضبوط هئي ۽ بالرز کي به ريورس سوئنگ جو فائدو حاصل ٿي رهيو هو پر صورتحال ان وقت تبديل ٿي وئي، جڏهن فيلڊرز ميچ ۾ ڪيچ ڊراپ ڪيا. لاهور ٽيسٽ ميچ جي حوالي سان هن اميد ظاهر ڪئي ته هو سيريز جي ٽئين ۽ آخري ميچ کٽڻ جي ڪوشش ڪندا.
