دبئي: انٽرنيشنل ڪرڪيٽ ڪائونسل (آءِ سي سي) رانديگرن جي رينڪنگ جاري ڪري ڇڏي آهي. آءِ سي سي موجب ٽي-20 بيٽسمينن جي رينڪنگ ۾ پاڪستان جو بابر اعظم پهرئين ۽ رضوان ٻئين نمبر تي آهي، جڏهن ته ڀارت جو ويرات ڪوهلي 24 هين نمبر تي اچي ويو آهي. بابراعظم ۽ رضوان کانسواءِ پاڪستان جو فخر زمان به ٽي-20 بيٽسمينن جي رينڪنگ ۾ 43 هين نمبر تي آهي. آءِ سي سي ٽي-20 بالرن جي رينڪنگ ۾ آسٽريليا جو جوش هيزل ووڊ بدستور پهرين نمبر تي آهي، جڏهن ته پاڪستان جو شاهين آفريدي 12 هين نمبر تي آهي. ان کان علاوه بالرن ۾ پاڪستان جو شاداب خان 17 هين، حارث رئوف 27 هين، عماد وسيم 44 هين، محمد نواز 61 هين، حسن علي 65 هين ۽ فهيم اشرف 97 هين نمبر تي آهي.
افغانستان جو محمد نبي آءِ سي سي ٽي-ٽوئنٽي آل رائونڊرز جي رينڪنگ ۾ پهرئين نمبر تي برقرار آهي. آءِ سي سي ون ڊي انٽرنيشنل بيٽسمينن جي رينڪنگ ۾ بابر اعظم پهرين ۽ امام الحق ٻي پوزيشن برقرار رکي ڇڏي آهي، جڏهن ته ڏکڻ آفريڪا جو وان ڊير ڊوسن ٽئين نمبر تي اچي ويو آهي. ون ڊي رينڪنگ ۾ ڀارت جو ويرات ڪوهلي ٽئين کان چوٿين نمبر تي اچي ويو آهي. ون ڊي بالرن جي رينڪنگ ۾ نيوزيلينڊ جو ٽرينٽ بولٽ پهرين، ڀارت جو جسپريت بمراه ٻئين ۽ پاڪستان جو شاهين آفريدي ٽئين نمبر تي آهي. ون ڊي آل رائونڊرز جي رينڪنگ ۾ بنگلاديش جو شڪيب الحسن پهرئين، افغانستان جو محمد نبي ٻئين ۽ راشد خان ٽئين نمبر تي آهي.
