زمبابوي جي ڪرڪيٽ ٽيم آسٽريليا کي هوم گرائونڊ تي شڪست ڏئي وڏو اپ سيٽ ڪري ڇڏيو آهي. ميڊيا مطابق ون ڊي سيريز جي ٽين ميچ ۾ زمبابوي دنيا جي فل اسٽرينٿ اسڪواڊ کي گهر ۾ شڪست ڏئي ڪرڪيٽ ۾ تاريخ لکي ڇڏي آهي. زمبابوي جي ڪپتان ٽاس کٽي بالنگ جو فيصلو ڪيو، جيڪو سندن حق ۾ بهتر ثابت ٿيو. آسٽريليا جي ٽيم مان ڊيوڊ وارنر 94 جي اننگز کيڏي پاڻ ملهايو، پر باقي بيٽر سندس ساٿ نھ ڏئي سگهيا. ڪپتان ايرون فنچ 5، ايلڪس ڪيري 4، مارڪس اسٽوئنس ۽ ڪيمرون گرين 3،3 رنسون ٺاهي سگهيا. گلين ميڪسويل 19 رنسن سان نڀايو ۽ سڄي ٽيم 142 رنسن تي آئوٽ ٿي وئي. جڏهن تھ زمبابوي جي ٽيم 47 اوور ۾ 7 وڪيٽن تي هدف ماڻي ورتو مريوماني 35، چڪابووا 37 رنسن سان نمايان رهيا. زمبابوي جي بالر ريان برل وارنر، فنچ، ميڪسويل، ايگر ۽ مچل اسٽارڪ کي آئوٽ ڪري ڪاميابي ۾ ڪردار ادا ڪيو. آسٽريليا جي جوش هزل ووڊ بھ 3 وڪيٽون ورتيون آهن.
