انگلينڊ جي ڪرڪيٽ ٽيم 17 سالن بعد سيريز کيڏڻ خاطر پاڪستان پهچي وئي آهي، جنهن جي ڪمنٽري پينل جو بھ اعلان ڪيو ويو آهي. ميڊيا مطابق پاڪستان ۾ ستن ميچن تي ٻڌل ٽي 20 سيريز کيڏڻ جي ڏس ۾ ڪپتان جوز بٽلر جي اڳواڻي ۾ انگلش ٽيم جو 19 رڪني اسڪواڊ ڪراچي پهتو آهي. رپورٽ ۾ چيو ويو آهي تھ دبئي رستي ڪراچي پهچندڙ انگلش ٽيم جي سيڪيورٽي جا غيرمعمولي بندوبس ڪيا ويا هئا، جنهن دوران رانديگرن کي سندن رهائش واري هوٽل ۾ منتقل ڪيو ويو آهي. مهمان ٽيم پهرين ميچ 20 سيپٽمبر تي کيڏندي، 22، 23 ۽ 25 سيپٽمبر واريون ميچون ڪراچي ۾ ٿينديون. جڏهن تھ، 30 سيپٽمبر ۽ 2 آڪٽوبر تي رٿيل ميچون لاهور ۾ کيڏيون وينديون. هوڏانهن پاڪستان ۽ انگلينڊ جون ٽيمون پريڪٽس سڀاڻي کان ڪنديون. ٻئي پاسي پي سي بي سيريز جي حوالي سان ڪمنٽري پينل جو بھ اعلان ڪيو آهي، جنهن ۾ وسيم اڪرم، عروج ممتاز، وقار يونس، بازيد خان، زينب عباس ۽ عامر سهيل شامل آهن.
