لاهور: ڪراچي جي قسمت روشن ٿي وئي، “ڊبل ٽيسٽ ڊوز” ملڻ جو امڪان آهي، لانگ مارچ ۽ احتجاج کي نظر ۾ رکندي انگلينڊ خلاف پهرين ۽ ٽئين ميچ جي ميزباني شهر قائد کي ڏيڻ تي غور ويچار ڪيو ويو آهي. انگلينڊ جي ٽيم 20 سالن کانپوءِ پاڪستان ۾ ٽيسٽ سيريز کيڏڻ لاءِ اچي رهي آهي، شيڊول موجب دوري تي آيل اسڪواڊ کي 27 نومبر تي صبح جو اسلام آباد پهچڻو آهي، پهرين ٽيسٽ پهرين ڊسمبر کان راولپنڊي ۾ کيڏي ويندي. ٻي ٽيسٽ 9 ڊسمبر کان ملتان ۽ ٽين ٽيسٽ 17 ڊسمبر کان ڪراچي ۾ کيڏي ويندي. جڏهن ته پي ٽي آءِ جو لانگ مارچ راولپنڊي ۽ اسلام آباد طرف وڌي رهيو آهي، نومبر جي آخري هفتي دوران جڙيل شهرن ۾ سرگرميون عروج تي پهچنديون. ساڳئي وقت انگلش ٽيم اسلام آباد پهچندي. ذريعن موجب امڪاني حالتن کي نظر ۾ رکندي سيريز جي پهرين ميچ ڪراچي ۾ کيڏڻ تي غور ڪيو ويو آهي، ملتان ۾ ٻي ٽيسٽ کيڏڻ کانپوءِ ٽيمون ٽين ٽيسٽ لاءِ به ٽيمون ڪراچي واپس اينديون. پي سي بي ذريعن جو چوڻ آهي ته في الحال شيڊول ۾ تبديلي جو ڪو به فيصلو ناهي ڪيو ويو پر پلان بي ضرور غور هيٺ آهي، حتمي فيصلو سمورن اسٽيڪ هولڊرز سان مشاورت کانپوءِ ئي ڪيو ويندو.
