ايشين گيمز جو ميدان مارڻ لاءِ شاهين تياري وٺي ڇڏي آهي، جنهن لاءِ پاڪستان شاهين جي 15 رڪني اسڪواڊ جو اعلان ڪيو ويو آهي. ميڊيا مطابق پي سي بي جي ٽيم مينجمينٽ پاڪستان شاهين جي 15 رڪني ٽيم جي ڪپتاني آل رائونڊر قاسم اڪرم حوالي ڪئي آهي، جنهن 20 فرسٽ ڪلاس ميچز ۾ پرفارم ڪيو، 40 ٽي 20 بھ کيڏي چڪو آهي ۽ گذريل انڊر 19 ورلڊ ڪپ ۾ پاڪستاني ٽيم جو ڪپتان رهيو آهي. هوڏانهن چين جي هينگ زو 28 سيپٽمبر کان 7 آڪٽوبر تائين ٿيندڙ ايونٽ ۾ ٽي 20 ڪرڪيٽ بھ شامل ڪئي وئي آهي، جنهن ۾ پاڪستان پڻ شامل آهي. پي سي بي موجب اسڪواڊ ۾ 8 انٽرنيشنل ڪرڪيٽ کيڏندڙ شاهنواز ڏاهاڻي، عثمان قادر، محمد حسنين، حيدر علي ۽ ٻيا کنيا ويا آهن. جڏهن تھ اسڪواڊ ۾ عامر جمال، عرفات منهاس، ارشد اقبال، آصف علي، روحيل نذير، خوشدل شاهه، مرزا طاهر بيگ ۽ ٻين جڳهه ٺاهي ورتي آهي، ريزروو رانديگرن ۾ عبدالواحد بنگلزئي، مهراڻ ممتاز، عمران جونيئر، عرفان خان نيازي ۽ مبصر خان شامل آهن.
