گال: پاڪستان، سريلنڪا کي گال ٽيسٽ ۾ شڪست ڏئي تاريخ رقم ڪري ڇڏي. سريلنڪا خلاف سيريز جي پهرين ٽيسٽ جي ٻي اننگز ۾ عبدالله شفيق جي 158 ۽ ڪپتان بابراعظم جي پهرين اننگز ۾ 119 رنسن جي بدلي پاڪستان لنڪن ٽائيگرز خلاف پنهنجو ٻيو وڏو هدف حاصل ڪري ورتو، جڏهن ته گال اسٽيڊيم ۾ سڀ کان وڏو ٽارگيٽ حاصل ڪرڻ جو رڪارڊ به پاڪستان پنهنجي نالي ڪري ورتو آهي. ان کان اڳ پاڪستان سال 2015 ۾ پالي ڪيلي اسٽيڊيم ۾ سريلنڪا خلاف 377 رنسن جو ٽارگيٽ حاصل ڪيو هو. گال ٽيسٽ ميچ ۾ قومي ٽيم جي اوپنر عبدالله شفيق پهرين 6 ٽيسٽ ميچن ۾ سڀ کان وڌيڪ رنسون ٺاهڻ جو جاويد ميانداد جو رڪارڊ به پنهنجي نالي ڪري ورتو آهي.
پاڪستان جي اڳوڻي ڪپتان ليجنڊ بيٽسمين جاويد ميانداد پنهنجي پهرين 6 ٽيسٽ ميچن ۾ 652 رنسون ٺاهيون هيون، جڏهن ته عبدالله شفيق پنهنجي پهرين 6 ٽيسٽ ميچن ۾ 700 کان وڌيڪ رنسون اسڪور ڪري چڪو آهي، جڏهن ته هو ٽيسٽ ڪرڪيٽ ۾ هن وقت تائين 2 سينچريون ۽ 4 هاف سينچريون پڻ هڻي چڪو آهي. واضح رهي ته قومي اوپنر ٽيسٽ تاريخ ۾ پهريون بيٽسمين آهي جنهن ٽارگيٽ جي تعاقب ۾ 500 منٽن کان وڌيڪ بيٽنگ ڪئي ۽ ٽيم کي فتح تائين پهچايو، هو 524 منٽن تائين ڪريز تي موجود رهيو.
