سريلنڪا جي اسپنرز جو جادو هلي ويو آهي، جنهن پاڪستان کي ٻي ٽيسٽ ۾ 246 رنسن تان شڪست ڏئي سيريز برابر ڪري ڇڏي آهي. ميڊيا مطابق پاڪستاني بيٽرن 89 رنسن تي هڪ وڪيٽ جي نقصان تي آخري ڏينهن تي اننگ شروع ڪئي تھ، ڪپتان بابراعظم ذميواراڻي بيٽنگ ڪندي 81 رنسن سان ٽيم ۾ اميد پيدا ڪئي، امام الحق ڪجهه دير ساٿ ڏنو ۽ 49 رنسن تي آئوٽ ٿي ويو، پر بابراعظم جي آئوٽ ٿيڻ بعد باقي بيٽر پچ تي بيهي نھ سگهيا ۽ اهي آئوٽ ٿيندا ويا. جڏهن تھ محمد رضوان 37، فواد عالم هڪ، آغا سلمان 4، محمد نواز 12، ياسر شاهه 27، حسن علي 11 ۽ نسيم شاهه 18 رنسن تي آئوٽ ٿي ويا، نعمان علي بنا اسڪور جي ناٽ آئوٽ رهيو. سريلنڪا جي بالرن مان پرابٿ جئي سوريا 5 ۽ رميش مينڊس 4 وڪيٽون ورتيون آهن. ياد رهي تھ سريلنڪا راند جي چوٿين ڏهاڙي تي پنهنجي اننگز 8 وڪيٽن جي نقصان تي 360 رنسون ٺاهي ڊڪليئر ڪري ڇڏي هئي، جنهن ۾ ڌننجيا ڊي سلوا 109 رنسن تي ناٽ آئوٽ رهيو. سريلنڪا جي 508 رنسن جي هدف پويان کيڏندي پاڪستان جي سڄي ٽيم ٻي اننگز ۾ 261 رنسن تي آئوٽ ٿي شڪست جو شڪار ٿي وئي آهي. مجموعي طور تي سريلنڪا پهرين اننگز ۾ 378 ۽ ٻي اننگز ۾ 360 رنسون ٺاهيون ۽ پاڪستاني ٽيم پهرين اننگز ۾ 231 ۽ ٻِي اننگز ۾ 261 رنسون ٺاهيون. جڏهن تُھ پرابٿ جئي سوريا مجموعي طور 17 وڪيٽن سان پليئر آف دي سيريز ۽ ڌننجيا ڊي سلوا پليئر آف دي ميچ جا ايوارڊ حاصل ڪيا آهن.
