پي سي بي مينيجمينٽ ڪاميٽي جي چيئرمين ذڪا اشرف ڪرڪيٽ ڪاميٽي کي مضبوط بڻائڻ لاءِ مصباح کي فري هينڊ ڏئي ڇڏيو آهي، جڏهن تھ موجودا فيصلن جي روشني ۾ مڪي آرٿي ۽ گرانٽ برينڊرن جو پنهنجن عهدن تي برقرار رهڻ ڏکيو نظر اچي رهيو آهي. ميڊيا مطابق پي سي بي جي سربراهه ذڪا اشرف ڪرڪيٽ ڪاميٽي جي سربراهه مصباح الحق کي پيغام ڏئي سينيئر ڪرڪيٽر گڏ کڻڻ جو مشورو بھ ڏنو آهي. ذريعن جو چوڻ آهي تھ مصباح ڪرڪيٽ بورڊ جي سينيئر عهديدارن سان ملڻ ۾ مصروف آهي، جيڪو ڪوشش ڪري رهيو آهي تھ ڪرڪيٽ ڪاميٽي ۾ آڻڻ لاءِ سينيئر ڪرڪيٽرن جا نالا اڄ ئي فائنل ٿي وڃن. ذريعن جو چوڻ آهي تھ نئين ڪرڪيٽ ڪاميٽي هيڊ ڪوچ بابت تجويزون ڏيندي، جڏهن تھ سليڪشن ڪاميٽي ۾ محمد حفيظ جي شموليت جو امڪان آهي، ڇاڪاڻ تھ ذڪا اشرف سندس حمايت ڪري رهيو آهي. ٻئي پاسي ذڪا اشرف مصباح الحق کي پيغام موڪلي چيو آهي تھ سينيئر ڪرڪيٽ گڏ کڻي ڪاميٽي ۾ آڻيو ۽ ڪرڪيٽ جا معاملا ڏسو، منهنجي خواهش آهي تھ ڪرڪيٽ ڪاميٽي کي بااختيار ۽ مضبوط بنايو وڃي.
