پي سي بي ڏکڻ آفريقا خلاف هوم سيريز لاءِ پاڪستان ويمن ڪرڪيٽ ٽيم جي 15 رڪني مضبوط اسڪواڊ جو اعلان ڪري ڇڏيو آهي. ميڊيا مطابق ڪراچي جي نيشنل اسٽيڊيم ۾ رٿيل سمورين ميچن لاءِ ڏکڻ آفريقا جي ويمن ٽيم پهريون ڀيرو پاڪستان جو دورو ڪندي. پي سي بي موجب مهمان ٽيم ڪراچي ۾ 3 سيپٽمبر کان 5 سيپٽيمبر تائين ٽي 20 جون 3 ميچون کيڏندي، بعد ۾ اها ساڳي جڳهه تي 3 ون ڊي ميچ 8 سيپٽمبر کان 14 سيپٽمبر تائين کيڏندي. هوڏانهن پاڪستان ويمن ٽيم جي چيف سليڪتر سليم جعفر ڏکڻ آفريقا خلاف سيريز لاءِ ون ڊي ٽي 20 جي ڌار ڌار اسڪواڊز جو اعلان ڪيو آهي، جن ۾ ڪائنات امتياز ۽ عائشا نسيم جڳهه ٺاهڻ ۾ ناڪام ٿي ويون آهن، جڏهن تھ عروب شاهه ۽ نتاليا پرويز واپسي ڪري ورتي آهي. چيف سليڪٽر سليم جعفر جو چوڻ هو تھ اسان ڪپتان ندا ڊار سان مشاورت بعد اسڪواڊ جو اعلان ڪيو آهي عروب ۽ نتاليا کي اسڪواڊ ۾ واپس آندو آهي، ڪائنات امتياز ۽ عائشا نسيم جڳهه نھ ٺاهي سگهيون آهن. اسڪواڊ ۾ ڪپتان ندا ڊار، بسما معروف، ڊيانا بيگ، فاطما ثنا، منيبا علي، نجيها علوي، نشرا سنڌو، نتاليا پرويز، صدف شمس، سعديا اقبال، شوال ذوالفقار، سدرا امين، عروب شاهه، ام هاني، غلام فاطما، عاليا رياض، عميما سهيل، سدرا نواز، وحيدا اختر شامل آهن، انوشي ۽ طوبا حسن ريزروو طور شامل آهن.
