جيڪڏهن ملڪ ۾ هفتيوار مهانگائي جو جائزو وٺجي ته ان ۾ اڪثر شين جا اگهه وڌي آهن ان جي ڀيٽ ۾ جن شين جي اگهن ۾ لاٿ ايندي آهي، اهي گهٽ ئي هونديون آهن. ان مان واضح آهي ته مهانگائي وڌي پئي. جيڪا عام ماڻهو لا مصيبتون کڻي اچي ٿي. تازو ئي هڪ هفتي ۾ عام واهپي واري 18 شين جا اگهه وڌي ويا آهن. وفاقي ڳڻپ واري کاتي پاران جاري ڪيل هفتيوار رپورٽ ۾ ٻڌايو ويو آهي ته سڄي ملڪ ۾ هاڻوڪي هفتي دوران عام واهپي واري 18 شين جي اگهن ۾ واڌ ٿي آهي. وفاقي ڳڻپ واري کاتي هفتيوار مهانگائي جي انگن اکرن بابت رپورٽ موجب هاڻوڪي هفتي عام واهپي واري 18 شين جي اگهن ۾ واڌ ۽ 17 شين ۾ لاٿ ٿي، جڏهن ته 16 شين جا اگهه مستحڪم رهيا آهن. ٻئي پاسي پاسي نيپرا ڪراچي کان علاوه سڄي ملڪ ۾ فيول چارجز ايڊجسٽمنٽ جي مد ۾ بجلي جي قيمت ۾ 19 پئسا في يونٽ واڌ جي منطوري ڏئي ڇڏي آهي. نوٽيفڪيشن ۾ چيو ويو ته ان تي عمل صرف آڪٽوبر جي بلن تي ٿيندو. جڏهن ته ان جو لائيف لائن، اليڪٽرڪ ويڪل چارجنگ اسٽيشن کان علاوه ڪي اليڪٽرڪ واهيپيدارن تي به لاڳو نه ٿيندو.
ڪٿان به ڪا اميد نظر نه پئي اچي ته عوام لا ڪو ڀلو ٿيڻ وارو آهي، هر ايندڙ ڏينهن عوام لا نيون مصيبتون کڻي اچي رهيو آهي. هن وقت ملڪ ۾ عوام لا ٻين سڀني مصيبتن کان وڌيڪ وڏي مصيبت مهانگائي آهي جنهن غريب ماڻهن جو جيئڻ جنجال ڪري ڇڏيو آهي. هڪ 4 سئو رپيا ڏهاڙي تي مزدوري ڪندڙ پورهيت ان لا پريشان آهي ته هو ايڏي مهانگائي ۾ پيٽ، پالي، دوائون وٺي يا ٻارن جي تعليم تي خرچ ڪري. جيئن تيئن ڪري غريب ماڻهو اڃا هڪڙو هفتو گذاري ئي مس ٿو ته مٿان مهانگائي جي شڪل ۾ ٻيو عذاب نازل ٿي ٿو وڃيس. ان باوجود حڪمران معاشي بهتري جون دعوائون ڪندي نه پيا ٿڪجن.
هن ملڪ ۾ ڏينهن ته حڪمرانن جا تبديل ٿيندا آهن، عوام لا ته ڪو به ڏينهن تبديل ناهي ٿيندو. عوام لا رڳو چهرا تبديل ٿيندا آهن، پر عوام دشمن معاشي پاليسيون جاري رهنديون آهن. اهو ئي سبب آهي جو اڄ به مهانگائي کي پر لڳل آهن. ڪا به شئي اهڙي ناهي جيڪا مهانگائي جي حملي کان بچي هجي. عام واهپي وارين شين جا اگهه آئي ڏينهن وڌي رهيا آهن، ۽ اگهن تي ڪنٽرول جا ڪي به امڪان نظر نه پيا اچن. حڪومت جي معاشي قدمن مان لڳي ايئن رهيو آهي ته هو هڪ عوام مخالف ايجنڊا کڻي آئي آهي. اهو ئي سبب آهي جو هو مهانگائي مٿان مهانگائي ڪري رهي آهي. هي اهي ساڳا حڪمران آهن جيڪي اڳوڻي حڪومت جي دور ۾ مهانگائي خلاف مارچ ڪندا هئا. هاڻي مهانگائي ۾ اڳوڻي حڪومت کي به مات ڏئي رهيا آهن. ان مان اهو ئي ثابت ٿئي ٿو ته عوام حڪمرانن جي ايجندا جو حصو ناهي. هنن وٽ حل صرف هڪڙو آهي، اهو آهي آ ايم ايف. اهو ئي سبب آهي جو آ ايم کان قرض ملڻ کي به حڪمران وڏو اعزاز سمجهن ٿا.
اسان سمجهون ٿا ته هن مهل حڪمران جن معاشي پاليسين تي عمل ڪري رهيا آهن اهي آ ايم ايف جا ئي طئي ٿيل آهن. آ ايم ايف جو ڪردار ڪهڙو آهي، ان جو اندازو ان خلاف دنيا جي مختلف ملڪن ۾ ٿيندڙ عوامي احتجاجن مان ڪري سگهجي ٿو. آ ايم ايف هڪ عوام دشمن عالمي مالياتي ادارو آهي. هتان جا حڪمران وري ويٺا ئي آ ايم ايف جي آسري ۾ آهن، ان مان اهو ئي واضح ٿئي ٿو ته حڪمرانن وٽ پنهنجي ڪابه معاشي پاليسي ڪانهي. اسان سمجهون ٿا ته اها مڪمل طور عوام مخالف ايجنڊا آهي. ملڪ جي عوام کي پوري طرح آ ايم ايف جي رحم ڪرم تي ڇڏيو ويو آهي. اسان جو حڪمرانن کان مطالبو آهي ته هو فوري طور آ ايم ايف جي عوام مخالف ايجنڊا تي عمل ڪرڻ بند ڪري عام ماڻهن کي رليف فراهم ڪن.
