ٽي 20 ورلڊ ڪپ جي سپر 12 مرحلي جا مقابلا شروع ٿي ويا آهن، جنهن جي پهرين ميچ ۾ نيوزيلينڊ جي ٽيم ميزبان ۽ دفاعي چيمپيئن آسٽريليا کي 89 رنسن تان شڪست ڏئي ڪرڪيٽ جي شوقينن کي حيران ڪري ڇڏيو آهي. نيوزيلينڊ 3 وڪيٽن جي نقصان تي 200 رنسون ٺاهيون، جنهن ۾ اوپنر فن ايلن جارحاڻي راند کيڏندي 42 اسڪور ڪيو، جنهن ۾ سندس 3 ڇڪا ۽ 5 چوڪا شامل آهن. جڏهن تھ ڪپتان ڪين وليمسن 23، گلين فلپس 12 رنسون ٺاهي نمايان رهيا. ڊيوڊ ڪانوي 3 ڇڪن ۽ 7 چوڪن جي مدد سان جارحاڻي راند کيڏندي 92 رنسن تي ناٽ آئوٽ رهيو، اهڙي ريت سندس ساٿ ۾ جيمس نيشام 26 رنسن تي ناٽ آئوٽ رهيو. آسٽريليا جي بالرن مان جوش هيزل ووڊ 2 ۽ ايڊم زمپا هڪ وڪيٽ ورتي. آسٽريليا جي سڄي ٽيم 111 رنسن جي اسڪور تي آئوٽ ٿي وئي، جنهن ۾ گلين ميڪسويل 28، پيٽ ڪمنز 21، مچل مارش 16، ڪپتان ايرون فنچ 13 ۽ ٽم ڊيوڊ 11 رنسون ٺاهي سگهيا. نيوزلينڊ جي بالرن ٽم سائودي ۽ مچل سينٽنر 3،3 وڪيٽون وٺي ميچ کٽرائڻ ۾ ڪردار ادا ڪيو. جڏهن تھ ٽرينٽ بولٽ 2 وڪيٽون ورتيون. ڊيون ڪونوي کي ناقابل شڪست رهڻ تي پليئر آف ميچ قرار ڏنو ويو آهي.
