سڊني: آسٽريليا جي ٽيسٽ ڪپتان پيٽ ڪمنز ساٿي مسلمان ڪرڪيٽر عثمان خواجه کي فتح جي جشن ۾ شامل ڪرڻ لاءِ شراب پيئڻ واري رسم کي روڪي ڇڏيو. ڪالهه آسٽريليا، انگلينڊ کي ايشز سيريز جي آخري ٽيسٽ ۾ شڪست ڏئي، پنجن ميچن جي سيريز 0-4 تان پنهنجي نالي ڪري ورتي آهي. آسٽريلوي ٽيم پاران سيريز جي فتح جي جشن ۾ ٽرافي سان گڏ فوٽو سيشن جي وڊيو سوشل ميڊيا تي وائرل ٿي رهي آهي.
سوشل ميڊيا تي وائرل ٿيل وڊيو ۾ ڏسي سگهجي ٿو ته جڏهن آسٽريلوي ٽيم ٽرافي سان گڏ شراب جو جشن ملهائڻ لاءِ گڏ ٿي ته ڪپتان پيٽ ڪمنز ڏٺو ته سندس ساٿي مسلمان ڪرڪيٽر عثمان خواجا ٽيم جي فوٽو سيشن ۾ موجود نه هو. پيٽ ڪمنز، عثمان خواجه کي فون ڪيو ۽ سمورن ساٿي ڪرڪيٽرن کي چيو ته هو ڪجهه دير لاءِ شراب سان جشن ڪرڻ بند ڪن، جنهن تي آسٽريلوي ڪرڪيٽرن شراب جون بوتلون زمين تي رکي ڇڏيون ۽ پوءِ عثمان خواجه ٽرافي سان گڏ فوٽوسيشن ۾ به حصو ورتو. آسٽريلوي ٽيسٽ ٽيم جي ڪپتان پيٽ ڪمنز جي ايڪشن کي سوشل ميڊيا تي ساراهيو پيو وڃي، جڏهن ته ان حوالي سان عثمان خواجه به سوشل ميڊيا تي رد عمل ڏنو آهي.
