ڪراچي: پاڪستان ۽ انگلينڊ جي ڪرڪيٽ ٽيمن وچ ۾ 7 ٽي-ٽوئنٽي انٽرنيشنل ميچن تي ٻڌل سيريز جي چوٿين ميچ سڀاڻي نيشنل اسٽيڊيم ڪراچي ۾ کيڏي ويندي. ميچ پاڪستاني وقت موجب شام 7:30 وڳي شروع ٿيندي، مهمان ٽيم انگلينڊ کي سيريز ۾ 1-2 جي سرسي حاصل آهي. پهرئين ٽي ٽوئنٽي ميچ ۾ انگلينڊ جي ٽيم 6 وڪيٽن تان ڪاميابي ماڻي هئي، ٻئي ميچ ۾ پاڪستان شاندار واپسي ڪندي 10 وڪيٽن تان ڪاميابي حاصل ڪري سيريز برابر ڪري ورتي هئي.
ٽئين ٽي-ٽوئنٽي ميچ ۾ انگلينڊ پنهنجي سٺي راند جي ڪري پاڪستان کي 63 رنسن تان شڪست ڏئي سيريز ۾ هڪ ڀيرو ٻيهر برتري حاصل ڪري ورتي آهي. ٻنهي ٽيمن وچ ۾ سيريز جا پهريان 4 ميچ نيشنل اسٽيڊيم ڪراچي ۾ کيڏيا ويندا، جڏهن ته آخري 3 ميچ قذافي اسٽيڊيم لاهور ۾ کيڏيا ويندا. سيريز جي پنجين ٽي-ٽوئنٽي ميچ 28 سيپٽمبر، ڇهين ميچ 30 سيپٽمبر جڏهن ته ستين ۽ آخري ميچ 2 آڪٽوبر تي کيڏي ويندي. آخري ٽئي ميچون لاهور جي قذافي اسٽيڊيم ۾ کيڏيون وينديون.
