آئي سي سي جو ننڍي فارميٽ وارو ميگا ايونٽ ٽي 20 ورلڊ ڪپ جا مقابلا شروع ٿي ويا آهن، جنهن جي افتتاحي ميچ ۾ نميبيا جي ٽيم ايشيا جي چيمپيئن سريلنڪا کي 55 رنسن تان شڪست ڏئي وڏو اپ سيٽ ڪري ورتو آهي. ميڊيا مطابق گيلونگ ۾ کيڏيل پهرين ميچ ۾ نميبيا پهرين بيٽنگ ڪندي 7 وڪيٽن جي نقصان تي 163 رنسون ٺاهي سريلنڪا کي هدف ڏنو، جنهن ۾ جان فرائلينڪ 44 رنسن جي شاندار اننگز کيڏي.
جڏهن تھ جي جي سمٿ 31، استيفن بارڊ 26، نڪول ليفٽي ايٽن ۽ جيرهارڊ اراسموس 20،20 رنسن جي اننگز کيڏي نمايان رهيا. سريلنڪا جي بالرن پرومود مدوشان 2 وڪيٽن سان نمايان رهيو. هوڏانهن 164 رنسن جي هدف جي جواب ۾ سريلنڪا جي ٽيم 19 اوور ۾ 108 رنسون ٺاهي آئوٽ ٿي وئي، جنهن ۾ ڪپتان ڊاسن شناڪا 29، ڀانوڪا راجاپڪسا 20 ۽ مهيش ٺيڪشانا 11 رنسن سان نمايان رهيا.
نميبيا جي بالرن مان ڊيوڊ ويسي، بيرنارڊ شيلٽز، بين شڪينگو ۽ جان فرائيلنڪ 2،2،2 وڪيٽون وٺي سريلنڪا کي ناڪام بڻائي ڪرڪيٽ ۾ وڏو اپ سيٽ ڪيو آهي. جڏهن تھ راند جي پڄاڻي تي فرائيلنڪ کي 2 وڪيٽون وٺڻ ۽ 44 رنسن جي اننگز کيڏڻ تي پليئر آف ميچ جو ايوارڊ ڏنو ويو آهي.
