اندور: آسٽريليا ڀارت کي ٽئين ٽيسٽ ميچ ۾ 9 وڪيٽن تان شڪست ڏئي آءِ سي سي ٽيسٽ چيمپيئن شپ جي فائنل لاءِ ٽڪيٽ حاصل ڪري ورتي آهي. اندور ۾ کيڏيل ٽيسٽ ميچ ۾ آسٽريليا ڀارت خلاف جارحاڻي حڪمت عملي اختيار ڪئي، پهرين بيٽنگ ڪندي ڀارتي ٽيم پهرين اننگز ۾ 109 رنسون ٺاهي آئوٽ ٿي وئي. جڏهن ته آسٽريليا 197 رنسون ٺاهيون ۽ 88 رنسن جي سرسي حاصل ڪئي جڏهن ته ٻي اننگز ۾ ڀارتي سورما صرف 163 رنسون ٺاهي پويلين موٽي ويا ۽ ڪينگروز کي 76 رنسن جو ٽارگيٽ مليو. آسٽريليا جارحاڻي راند جو مظاهرو ڪندي هدف هڪ وڪيٽ جي نقصان تي ٽيسٽ ميچ جي ٽئين ڏينهن حاصل ڪري ورتو. آسٽريليا طرفان نٿين لائين 11 وڪيٽون ورتيون، جڏهن ته ميٿيو ڪوهنيمن 6 وڪيٽون ورتيون. آءِ سي سي ٽيسٽ چيمپيئن شپ جي فائنل لاءِ ڀارتي ٽيم کي چوٿين ٽيسٽ ۾ لازمي فتح جي ضرورت آهي.
