ٽنڊوآدم: ٽنڊوآدم ۾ ايم اي جناح روڊ تي جوابدار مبينا طور شادي لاءِ خريد ڪيل ناري 26 سالن جي سميرا ۽ سندس والده فرزانه زال عبدالستار شاهھ کي شاپنگ لاءِ شھر ۾ آندو ته عورتن شاپنگ ڪرڻ بدران ساڻس گڏ ھلڻ کان انڪار ڪري ڇڏيو، جنھن تان گھوٽ بڻيل ڄام نواز علي جي ڳوٺ مڱراڙي جي رھواسي نثار چانڊيو ۽ سندس مائٽن عورتن کي زوري کنڀي ڪار ۾ وجھڻ جي ڪوشش ڪئي ۽ انڪار تي وچ شھر ۾ تشدد جو نشانو بڻايو، جنهن سبب عورتن جا ڪپڙا ڦاٽي پيا ۽ برقعا لهي ويا، جوابدار عورتن ۽ ساڻن گڏ آيل ٻارڙن کي گهليندا رهيا، جنهن دوران ٽرئفڪ جام ٿي وئي. اطلاع ملڻ تي سٽي ٿاڻي جي پوليس پهچي ما ۽ ڌي کي بچائي گهوٽ نثار چانڊئي سميت 4 ڄڻن کي گرفتار ڪري ٿاڻي تي آندو، جتي پاڻ کي گهوٽ ظاهر ڪندڙ نثار چانڊيو ٻڌايو ته مدد علي بروهي سان سميرا جو رشتو اڍائي لکن ۾ خريد ڪيو ۽ نڪاح حيدرآباد ۾ ٿيو، آئون زال کي رخصتي ڪرائي ڳوٺ وٺي آيس، جتي رات رهياسين ۽ ٻئي ڏينهن ٽنڊي آدم ۾ خريداري لا آياسين ته زال سميرا جي ما فرزانه هلڻ کان انڪار ڪيو ۽ چيو ته حيدرآباد فوتگي ٿي آھي، اوڏانهن وينديوسين، هاڻي ڊرامون پيون ڪن. جڏهن ته سميرا جي ما فرزانه ٻڌايو ته منهنجي ڌي طلاق يافتا آھي، جنهن جي شادي لا رشتي واري کي چيو، جيڪا رشتو ڏيکارڻ ھتي وٺي آئي ۽ رات اسان کي ڳوٺ ۾ رهايو، اسان کي رشتو پسند نه آيو، هي اسان کي شاپنگ جو چئي شھر وٺي آيا، اسان حيدرآباد وڃڻ جو چيو ته هنن تشدد ڪيو ۽ ڪپڙا ڦاڙي گهليو، اسان شادي ناهي ڪئي، نه پئسا ورتا آھن، جوابدار الزام ٿا هڻن. عورتون ٿاڻي اندر روئنديون ۽ پاراتا ڏينديون رهيون. واقعي جو ڪيس داخل نه ٿيو هو، نه ئي گهوٽ نڪاح نامو پيش ڪري سگهيو هو.
