اسلام آباد : وزيراعظم عمران خان لاڳاپيل عملدارن کي ربيع جي فصلن لاءِ يوريا جي سپلاءِ چين جي موثر انتطام لاءِ سمورا امڪاني قدم کڻڻ جي هدايت ڪندي واضح ڪيو ته جيڪي ماڻهو هٿرادو کوٽ پيدا ڪرڻ ۾ ملوث آهن، انهن کي سختي سان منهن ڏنو ويندو. وزيراعظم عمران خان ملڪ ۾ ڀاڻ خاص ڪري يوريا جي طلب ۽ رسد جو جائزو وٺڻ لاءِ اجلاس ۾ خطاب ڪندي چيو ته ملڪ ۾ روزانو 25000 ٽن يوريا پيدا ٿئي ٿو، جيڪو اسان جي ضرورتن کي پورو ڪرڻ لاءِ ڪافي آهي. هن چيو ته گذريل سال ملڪ ۾ ڪڻڪ، ڪمند ڦٽي، ۽ مڪئي جو رڪارڊ بمپر فصل لٿو ۽ حڪومت جي زراعت دوست پاليسين جي ڪري مالي سال 2020-21 ۾ هارين 822 ارب رپيا اضافي آمدني حاصل ڪئي. اضافي آمدني جي نتيجي ۾ هارين طرفان يوريا وڌيڪ خريد ٿي آهي. وزيراعظم چيو ته حڪومت غذائي تحفظ ڏيڻ لاءِ ڪڻڪ جي وڌ کان وڌ پيداوار لاءِ مناسب مقدار ۾ ڀاڻ فراهم ڪرڻ تي ڌيان ڏنو آهي. وزيراعظم چيو ته هارين کي خاص طور تي ايندڙ ٽن هفتن ۾ ڀاڻ جي دستيابي ڪڻڪ جو بمپر فصل ماڊل ڪرڻ لاءِ اهم آهي. وزيراعظم صوبائي چيف سيڪريٽريز کي هدايت ڪئي ته اهي ضلعي انتطاميا جي ڪري ڀاڻ ذخيرو ڪرڻ، اسملگنگ ۽ سپلاءِ چين کان ٻاهر مڊل مين جي ذريعي خريداري کي روڪڻ لاءِ خاص قدم کڻن.
