لاڙڪاڻي ۾ سنڌ يونيورسٽي ٽيسٽ پاس اميدوارن تعليم کاتي ۾ پرائمري اسڪول ٽيچر جا آفر آرڊر نه ملڻ خلاف ڳچين ۾ سُڪل مانيون ٻڌي پريس ڪلب اڳيان احتجاجي مظاهرو ڪري علامتي بک هڙتال ڪئي. ان موقعي تي اميدوارن آفتاب منگي، علي ڏنو گاد، عاقل جتوئي، عبدالحميد قريشي، امجد بليدي ۽ ٻين چيو ته اسان 12 سال اڳ پرائمري اسڪول ٽيچر جي ڀرتين لاءِ سنڌ يونيورسٽي ٽيسٽ ڏئي 60 کان 80 مارڪون کڻي ڪاميابي حاصل ڪئي پر اسان جا نالا ويٽنگ لسٽ ۾ ڏئي جعلي ڊومسائيل رکندڙ ۽ من پسند سياسي اميدوارن کي آفر آرڊر ڏنا ويا. هن ڀيري به استادن جي ڀرتين ۾ پنهنجن کي نوازڻ لاءِ 99 سيڪڙو اميدوارن کي فيل ڪري ميرٽ جي لتاڙ ڪندي تعليمي نظام کي تباهه ڪرڻ جي سازش ڪئي وئي آهي. هنن مطالبو ڪيو ته تعليم کاتي ۾ تازو ٿيل ڀرتين کان اڳ 12 سالن کان انتظار ڪندڙ اميدوارن کي آفر آرڊر ڏئي روزگار فراهم ڪيو وڃي.
