ڄامشورو:ڄامشورو ۾ قلندر لعل شهباز جي زيارت ڪري واپس ويندڙ جوڙي کان ٽئڪسي ڊرائيور ڦرلٽ ڪئي ۽ مزاحمت تي ڪراچي واسي نوجوان پروفيسر کي قتل ڪري ڇڏيو. رپورٽ موجب ڄامشورو ٿاڻي جي حد پيٽارو ٽول پلازه ويجهو ٽئڪسي ڊرائيور گاڏي روڪي ڪراچي واسين کان ڦر ڪئي، جنهن ۾ مزاحمت تي ٽئڪسي ڊرائيور جي روپ ۾ موجود هٿياربند ڪياماڙي واسي نوجوان سمندر خان کي زال اڳيان گوليون هڻي قتل ڪري ڇڏيو، جوابدار روڪ رقم ۽ سونا زيور ڦر ڪري فرار ٿي ويو، واقعي جي اطلاع تي پوليس پهچي لاش کڻائي لمس اسپتال منتقل ڪيو. ڄامشورو پوليس موجب مقتول نوجوان پنهنجي گهرڀاتين سميت درگاهه قلندر لعل شهباز تي حاضري ڀري واپس ڪراچي وڃي رهيو هو ته واقعو پيش آيو، نوجوان جي سڃاڻپ سمندر خان پٽ حبيب خان طور ٿي آهي، جيڪو ڪياماڙي ڪراچي جو رهواسي آهي. پوليس جو اهو به چوڻ آهي ته گهرڀاتي جمعرات قلندر تي حاضري ڀرڻ پهتا هئا ۽ فجر مهل سيوهڻ کان ڪراچي لاءِ ٽئڪسي ڪرائي هئي، ٽول پلازه وٽ ڊرائيور گاڏي روڪي ڦرلٽ ڪئي. مقتول جي زال زرين بي بي موجب ڦر دوران مڙس سمندر خان مزاحمت ڪئي ته منهنجي آڏو کيس هٿياربند ڊرائيور گوليون هڻي قتل ڪيو، اسان سيوهڻ مان ڪار ۾ سوار ٿي واپس ڪراچي وڃي رهيا هئاسين ته پيٽارو ٽول ڪراس ڪرڻ کانپوءِ ڪار واري اسان کان ڦر جي ڪوشش ڪئي، جنهن دوران مزاحمت تي جوابدار منهنجي مڙس کي قتل ڪري مون کان 3 تولاسون ۽ 90 هزار رپيا ڦر ڪري فرار ٿي ويو، منهنجو مڙس پروفيسر هو. پوليس موجب مقتول نوجوان جو لاش ضروري ڪارروائي بعد زال حوالي ڪيو ويو آهي، جيڪا لاش ايمبولينس ذريعي ڪراچي کڻائي وئي.
