نيوسعيدآباد: نيوسعيدآباد پوليس جي 176 پڪي شراب جون بوتلون، ھڪ چنگچي رڪشا ۽ 5000 ليٽر ڪچو شراب ھٿ ڪري 3 جوابدار گرفتار ڪرڻ جي دعوى ڪئي آهي. ڊي ايس پي نيوسعيدآباد عبدالواحد کوسو ۽ ايس ايڇ او نيوسعيدآباد محمد شريف کوسو پوليس اسٽيشن تي پريس ڪانفرنس ڪندي ٻڌايو ته نيوسعيدآباد ۾ منشيات فروشن خلاف ڪريڪ ڊائون شروع ڪيو ويو آھي، جنھن تحت پوليس ڳجهي اطلاع ملڻ تي ناڪابندي ڪري پراڻي سعيدآباد لنڪ روڊ تي ريگيوليٽر وٽ چنگچي کي روڪي ان مان 176 پڪي شراب جون بوتلون ھٿ ڪري ٻن جوابدارن علي نواز خاصخيلي پٽ لکاڏنو خاصخيلي ۽ عبدالجبار پٽ حمزو خاصخيلي کي گرفتار ڪيو ۽ شراب جي بوتلن سان گڏ چنگچي رڪشا کي به قبضي ۾ ورتو آھي.
جڏهن ته نويد سٽي ۾ غلام سرور ماڇي جي گھر تي ڇاپو ھڻي، حاجي ماڇي ولد گل حسن ماڇي ويٺل ڳوٺ امين لاکو کي گرفتار ڪري ان کان اٽڪل 5000 ليٽر ڪچو شراب ھٿ ڪيو آهي، جڏھن ته ھڪ جوابدار غلام سرور ماڇي ڀڄي وڃڻ ۾ ڪامياب ٿي ويو، پوليس ٽنھي جوابدارن خلاف 3 الڳ الڳ ايف آ آرون داخل ڪري ورتيون آھن.
