تربت: تربت ۾ مبينا طور تي آپگهاتي بمبار عورت کي گرفتار ڪرڻ جي دعويٰ ڪئي وئي آهي. رپورٽ مطابق سي ٽي ڊي ۽ وومين پوليس ڪارروائي ڪندي سي پيڪ روٽ تي چيني قافلي کي نشانو بنائڻ لاءِ تيار ڪيل آپگهاتي بمبار عورت کي گرفتار ڪري ورتو آهي. سي ٽي ڊي جي ترجمان موجب تربت سي ٽي ڊي ۽ وومين پوليس ڳجهي اطلاع تي هوشاب ۾ آپريشن دوران خودڪش بمبار عورت کي گرفتار ڪري ورتو آهي جنهن جي قبضي مان ڌماڪيدار مواد ۽ ڊينونيٽر هٿ آيا آهن. سي ٽي ڊي اختيارين ٻڌايو آهي ته عورت جو تعلق پابندي مڙهيل تنظيم بي ايل اي مجيد بريگيڊ سان آهي. دهشتگردن طرفان تيار آپگهاتي بمبار عورت سي پيڪ روٽ تي چيني قافلي کي نشانو بنائڻ چاهيو ٿي ۽ گرفتار عورت جو تعلق ان ئي گروپ سان آهي جنهن ڪراچي يونيورسٽي ۾ آپگهاتي حملو ڪيو هو.
