گڏاپ ڀرسان ڪاٺوڙ مان پيپلز پارٽي ايم پي اي سليم بلوچ جا ڀائيٽيا سلمان ڪلمتي ۽ صديق ڪلمتي مبينا طور اغوا ٿي ويا. خبر موجب گڏاپ جي علائقي ڪاٺوڙ ڀرسان ابراهيم ڳوٺ جي رهواسي پيپلز پارٽي ايم پي اي محمد سليم بلوچ جا ڀائيٽا ۽ ڊسٽرڪٽ ڪائونسل ڪراچي جي اڳوڻي ميمبر داد ڪريم بلوچ جا ڀاڻيجا سلمان ڪلمتي ۽ صديق ڪلمتي گذريل رات اغوا ٿي ويا آهن، وارثن جو چوڻ آهي ته اسان جا ٻئي نوجوان رات جي وقت مهراڻ ڪار ۾ گهران ٻاهر نڪري ويا، 2 کان اڍائي ڪلاڪ نوجوان ٻاهر هيا، جنهن کانپوءِ رابطو ڪرڻ تي نوجوانن ميسيج ڪري ٻڌايو ته ٿوري دير ۾ گهر اچي رهيا آهيون پر هڪ وڳي کانپوءِ رابطو مڪمل طور تي ختم ٿي ويو، گهڻي ڳولا باوجود ٻئي نوجوان هٿ نه اچي سگهيا آهن، ٻنهي جي عمر 18 کان 20 سالن جي اندر آهي. هنن چيو ته اسان کي شڪ آهي ته اسان جي نوجوانن کي اغوا ڪيو ويو آهي. ٻئي طرف اطلاع تي پيپلز پارٽي جي ايم پي اي محمد سليم بلوچ، داد ڪريم بلوچ، ن ليگ اڳواڻ قادر بخش ڪلمتي سميت وڏي انگ ۾ سياسي سماجي اڳواڻ ڪاٺوڙ ڀرسان ابراهيم ڳوٺ پهچي ويا. هوڏانهن پوليس سي سي ٽي وي سميت ٻين ذريعن سان نوجوانن جي ڳولا شروع ڪري ڇڏي آهي.
