سڪرنڊ ويجهو قومي شاهراهه تي ٽرالر جو موٽرسائيڪل سان ٽڪر ٿيڻ جي نتيجي ۾ ما پٽ سميت فوت، مڙس زخمي ٿي پيو. خبر موجب سڪرنڊ ويجهو قومي شاهراهه تي ڳوٺ ٿلهو انڙ جا رهواسي امجد انڙ سندس زال ۽ پٽ سڪرنڊ کان ڳوٺ وڃي رهيا هئا ته قومي شاهراهه چوٿون ميل اسٽاپ وٽ ٽرالر جو موٽرسائيڪل سان ٽڪر ٿي پيو، جنهن جي نتيجي ۾ 22 سالن جي رخسانه زال امجد انڙ ۽ سندس 5 سالن جو معصوم پٽ شهزاد ٿڏي تي فوت ٿي ويا. جڏهن ته امجد انڙ پڻ سخت زخمي ٿي پيو. جڏهن ته ٽرالر ڊرائيور اختر جان پڻ معمولي زخمي ٿي پيو. فوتين جا لاش تعلقي اسپتال سڪرنڊ آندا ويا، جتان ضروري ڪارروائي بعد لاش وارثن حوالي ڪيا ويا. ٽرالر ڊرائيور کي پوليس تحويل ۾ وٺي ڇڏيو. لاش سڪرنڊ ڀرسان ڳوٺ ٿلهو انڙ پهچڻ تي ڪهرام مچي ويو. جڏهن ته علائقي ۾ ڏک جي لهر پکڙجي وئي.
