باقراڻي ڪچي واري علائقي هٽڙي غلام شاهه ٿاڻي جي حد ڳوٺ گل ٻرڙو ويجهو چور ڊي ايس پي نصير آباد رياض عباسي جي ڀاءُ نورالدين عباسي، پرائمري استاد ذوالفقار ٻرڙو ۽ ٻين آبادگارن جي ٻني تي لڳل بجلي جا 3 ٽرانسفارمر لاهي تيل، ڪوائل ۽ انويٽر چوري ڪري ويا. اطلاع تي ھٽڙي غلام شاهه پوليس پهچي تفصيل معلوم ڪيا. جنهن بعد ڊي ايس پي عاقل آغا شڪيل پٺاڻ جي اڳواڻي ۾کوجي ڪتن ذريعي جوابدارن جا پيرا کنيا ويا جيڪي ڳوٺ علي جتوئي ۾ صدر جتوئي جي اوطاق تي لڳا. پوليس بنا گرفتاري جي خالي هٿ واپس موٽي آئي. رابطو ڪرڻ تي پوليس ٻڌايو ته چور ٽن آبادگارن جي ٻني تي لڳل ٽي ٽرانسفارمر هيٺ لاهي ڪوائل، تيل ڪڍي ۽ انويٽر به ساڻ کڻي ويا آهن. جوابدارن جا پيرا صدر جتوئي جي اوطاق تي لڳا. اوطاق خالي هئڻ سبب ڪا گرفتاري عمل ۾ نه آئي، وڌيڪ جاچ جاري آهي.
