اسلام آباد :پي ٽي آءِ چيئرمين ۽ اڳوڻي وزيراعظم عمران خان 2 جولاءِ تي پريڊ گرائونڊ ۾ حڪومت مخالف احتجاجي جلسي جو اعلان ڪري ڇڏيو آهي ۽ سمورن وڏن شهرن جي ڪارڪنن کي هدايت ڪئي آهي ته هو ڇنڇر جي رات پنهنجن پنهنجن شهرن ۾ جلسي جو بندوبست ڪن. سپر ٽيڪس لڳڻ سان بيروزگاري ۾ اضافو ٿيندو. بني گالا ۾ آن لائن نيوز ڪانفرنس کي خطاب ڪندي هن چيو ته پريڊ گرائونڊ ۾ هڪ ريلي کي خطاب ڪندس، جتي راولپنڊي ۽ اسلام آباد جا ماڻهو گڏ ٿيندا. جڏهن ته توهان پنهنجن پنهنجن شهرن ۾ ريلي ۾ شرڪت ڪندا ڇو ته اهو اسان جي ٻارن جي محفوظ مستقبل لاءِ ضروري آهي. هن چيو ته نيب قانون ۾ ترميمن کي چئلينج ڪرڻ لاءِ سپريم ڪورٽ ويا آهيون، اسان عدالت جو احترام ڪريون ٿا ته پاڪستان تي اهڙو ظلم نه ٿيڻ ڏينداسين. جيڪڏهن نيب قانون ۾ ترميمون قبول ڪيون وڃن ته پوءِ پاڪستان کي دشمن جي ضرورت نه پوندي. هن وڌيڪ چيو ته حڪومت پنجاهه هزار ماهوار ڪمائيندڙن تي به ٽيڪس لڳائي ڇڏيو آهي. حڪومت عوام تي وڌيڪ بار وجهي ڇڏيو آهي، هاڻي شيون وڌيڪ مهانگيون ٿينديون. هن چيو ته سپر ٽيڪس جي ڪري ڪارپوريٽ ٽيڪس 39 سيڪڙو تي ويندو. عمران خان خطي جي ٻين ملڪن سان ڀيٽ ڪندي چيو ته ڀارت ۽ بنگلاديش ۾ ڪارپوريٽ ٽيڪس 25 سيڪڙو آهي. هن چيو ته ڪيتريون ئي انڊسٽريز ماڻهن کي ڪڍڻ شروع ڪري ڇڏيو آهي، سپر ٽيڪس کانپوءِ اسٽاڪ مارڪيٽ ۾ ناڪاري اثر آيو آهي، بجيٽ ۾ حڪومت عوام جو معاشي قتل ڪيو آهي. سندس چوڻ هو ته نيب ترميمن ذريعي پاڪستان کي ناڪام رياست بڻايو پيو وڃي، نيب ترميم سان ملڪ جو مستقبل خطري ۾ آهي، انهن ترميمن سان ڪوڙو ۽ بي وقوف چور پڪريو ويندو، وڏو ۽ هوشيار چور بچي ويندو. هن تنقيد ڪندي چيو ته معيشت ٺيڪ ڪرڻ جي هنن جي ڪا تياري نه هئي، سندن ذهن ۾ هو ته ڪيئن اين آر او وٺڻو آهي.
