بخشاپور ٿاڻي جي حد ڳوٺ محمد عالم چاچڙ ۾ چاچڙ برادري جي ٻن ڌرين ۾ زمين جي مالڪي تان ٿيل پراڻي تڪرار تان جھيڙو ٿي پيو، جھيڙي دوران ڇتي فائرنگ ۾ گوليون لڳڻ ڪري 40 ورھين جو نوجوان شھمير چاچڙ ٿڏي تي قتل ٿي ويو. اطلاع تي بخشاپور پوليس واقعي واري ھنڌ پھچي ڳوٺ کي ڪڙو چاڙھي ڇڏيو ۽ نوجوان جو لاش ھٿ ڪرڻ بعد ضروري ڪارروائي لا ٿاڻي تي آندو جتان پوسٽ مارٽم لا بخشاپور اسپتال منتقل ڪيو. اسپتال مان پوسٽ مارٽم بعد لاش وارثن حوالي ڪيو ويو. قتل واري واقعي بابت پوليس جو چوڻ آهي ته چاچڙ برادري جي ٻن ڌرين ۾ زمين جي مالڪي تان پراڻي تڪرار سبب جھيڙو ٿيو، جنهن ۾ ھڪ نوجوان مارجي ويو آهي، جڏهن ته جوابدار گھر خالي ڪري فرار ٿي ويا آهن، جوابدارن جي ڳولا جاري آهي. واقعي جي وڌيڪ جاچ جاري آهي ۽ ھن وقت تائين قتل واري واقعي جو ڪيس داخل نه ٿي سگھيو آهي ۽ نه ئي ڪا گرفتاري عمل ۾ اچي سگھي آهي.
