ٽنڊوآدم: سنڌ جي ڪلاسيڪل وڏيري شاهنواز جوڻيجو جي وڇوڙي کي 17 ورهين ٿي ويا. سندس اڄ سادگي سان ورسي ملهائي ويندي. سنڌ جي ڪلاسيڪل وڏيري ۽ اڳوڻي مملڪتي وزير شاهنواز جوڻيجو کي وڇڙي 17 ورهين وهامي ويا آھن. اڄ ٽنڊوآدم لڳ ڳوٺ سنجر جوڻيجو ۾ ڪرونا وائرس ۽ برساتن سبب ورسي جي مک تقريب ملتوي ڪئي وئي آھي، تنهن هوندي به جوڻيجو ڪٽنب پاران شاهنواز جوڻيجو جي ورسي انتهائي سادگي سان ملهائي پئي وڃي. فجر نماز کانپو قرآن خواني ٿيندي، جنهن بعد سندس فرزند پ پ ايم اين اي روشن الدين جوڻيجو، اڳواڻو ايم اين اي محمد خان جوڻيجو، علاءُ الدين جوڻيجو ۽ اصغر جوڻيجو سميت ڪٽنب جا ڀاتي سندس آخري آرامگاهه تي گلن جون چادرون چاڙهي دعا گهرندا. شاهنواز جوڻيجو سياست جي شروعات مڪاني چونڊن کان ڪئي، هن پهريون ڀيرو پارلياماني سياست ۾ 1988ع جي چونڊن ۾ پ پ ٽڪيٽ تي اڳوڻي وزيراعظم محمد خان جوڻيجو کي شڪست ڏئي پير پاتو. کيس شهيد بينظير ڀٽو جي ڪابينا ۾ مملڪتي وزير بڻايو ويو. شاهنواز جوڻيجو انگريز دور ، ڀٽو دور ، ضياءَ جي آمريت جي دور ۾ ڪيترا ڀيرا جيل ياترائون ڪيون. سنڌ ۾ سندس سڃاڻپ جو حوالو سياست کانسواءِ راڄوڻي فيصلن ۽ سنڌ جي ثقافت جي امين طور بڻيل آهي.
