اسلام آباد :وزيراعظم شهباز شريف چيو آهي ته اين ڊي ايم اي ۽ صوبائي ڊزاسٽرمينيجمينٽ جي عملدارن جي گڏيل سروي بعد تازين برساتن ۽ ٻوڏ ۾ فوت ٿيل ماڻهن جي پوئينرن کي وفاقي حڪومت 10 لک روپيا في ڪس معاوضو ادا ڪندي. جڏهن ته نقصان جو جائزو وٺڻ ۽ ٻوڏ متاثرن سان يڪجهتي جي اظهار لاءِ جلد بلوچستان جو دورو پڻ ڪندس. خميس ڏينهن وزيراعظم آفيس جي ميڊيا ونگ پاران جاري ڪيل بيان موجب وزيراعظم شهباز شريف خيبرپختونخوا ۽ بلوچستان ۾ ٻوڏ جي صورتحال تي اعليٰ سطحي اجلاس جي صدارت ڪئي. وزيراعظم چيو ته اين ڊي ايم اي جو وقتي چيئرمين فوري طور تي ڪوئيٽا پهچندو ۽ ٻوڏ متاثرن جي امداد ۽ بحالي لاءِ بلوچستان حڪومت سان گڏجي ڪم ڪندو. هن چيو ته وفاقي ۽ صوبائي حڪومتن وچ ۾ جامع ڪوششن جي ضرورت آهي، خوشامد جي ڪا به گنجائش نه آهي. اين ڊي ايم اي بلوچستان ۽ خيبرپختونخوا جي ٻوڏ متاثر علائقن ۾ پنهنجي موجودگي وڌائي. هن چيو ته الله جو شڪر آهي ته سمورا آبي ذخيرا محفوظ آهن ۽ صورتحال تي 24 ڪلاڪ نظر رکي پئي وڃي. وزيراعظم هدايت ڪئي ته ايندڙ ڏينهن ۾ سانوڻي جي وڌيڪ برساتن کي نظر ۾ رکندي سمورا وفاقي ۽ صوبائي کاتا هاءِ الرٽ رهن. وزيراعظم چيو ته طوفاني برساتن ۽ ٻوڏ جي نتيجي ۾ قيمتي انساني جانيون ضايع ٿيڻ تي پوري قوم ڏکويل آهي، اسان ان ڏک جي گهڙي ۾ سوڳوار خاندانن سان گڏ آهيون. هن چيو ته بلوچستان ۽ ڪي پي ڪي جون حڪومتون هن وقت تائين بهترين ڪم ڪيو آهي پر وڌيڪ ڪم ڪرڻ جي ضرورت آهي، وفاقي حڪومت کين هر ممڪن تعاون فراهم ڪندي.
