پاڪستان پيپلزپارٽي جي چيئرمين بلاول ڀٽو زرداري چيو آهي ته شهيد شاهنواز ڀٽو جمهوريت پسند ۽ انقلابي سوچ رکندڙ هڪ وڏو اڳواڻ هو. بلاول ڀٽو زرداري شهيد شاهنواز ڀٽو جي ورسي تي پنهنجي پيغام ۾ چيو ته شهيد شاهنواز ڀٽو پارٽي قيادت، جيالن ۽ عوام جي دلين ۾ هميشه زنده رهندو، شهيد شاهنواز ڀٽو جو عزم ۽ استقلال ۽ جدوجهد ۽ قرباني عوام جي حقن لاءِ وڙهندڙ هر سياسي ڪارڪن لاءِ مشعل راهه آهي. هن چيو ته پاڪستان پيپلز پارٽي پنهنجي شهيدن جي قرباني کي رائيگان وڃڻ نه ڏيندي. اسان جو پختو عزم آهي ته اسان پنهنجي ملڪ ۾ آئين ۽ پارليمان جي بالادستي ۽ برابري تي ٻڌل معاشرو قائم ڪري ئي سک سان ويهنداسين، پارٽي عهديدار ۽ ڪارڪن شهيد شاهنواز ڀٽو جي مغفرت لاءِ دعا ڪن.
