دڙو: دڙي ۾ قومي عوامي تحريڪ طرفان ٽائون ڪاميٽي دڙو جي وارڊ 5 تي نامزد عورت اميدوار رفيعه پليجو جا وال پوسٽر ڦاڙڻ ۽ انهن جي تذليل ڪرڻ خلاف عورت اميدوار رفيعه پليجو پاران پير اگهاڙا ڪري سرڪاري اسپتال کان پڃاري پل چوڪ تائين احتجاجي ريلي ڪڍي وئي. جنهن ۾ قومي عوامي تحريڪ جي مرڪزي پريس ترجمان اشرف پليجو، جي يو آئي جي وارڊ 4 ۽ 5 تي نامزد اميدوارن حافظ عبدالغفور ميمڻ، اسد مور ميمڻ، ن ليگ جي وارڊ 3 تي نامزد اميدوار اقبال سومرو سميت مختلف سياسي، سماجي تنظيمن جي اڳواڻن ۽ شهرين وڏي انگ ۾ شرڪت ڪئي.
ان موقعي تي اڳواڻن چيو ته مخالف چونڊن ۾ پنهنجي شڪست ڏسي ڪريل حرڪت تي لهي آيا آهن. هنن چيو ته رفيعه پليجو سميت اسان جي اميدوارن جا پينافليڪس ۽ وال پوسٽر ڦاڙيا پيا وڃن، جيڪي ناقابل برداشت عمل آهي. هنن چيو ته چونڊن ۾ بيهڻ اسان جو جمهوري حق آهي، باقي اهڙين حرڪتن کان ڊڄي ميدان خالي نه ڇڏينداسين. هنن مطالبو ڪيو ته پينا فليڪس ۽ وال پوسٽر ڦاڙيندڙ جوابدارن کي گرفتار ڪري بيچيني ختم ڪئي وڃي.
