نئون ڪوٽ: نئون ڪوٽ ۾ ايل بي او ڊي سم نالي کي روڻيون پئجي ويون، ماڻهن خوف ۾ لڏپلاڻ شروع ڪري ڇڏي، لاڳاپيل انتظامي عملدار نه پهتا. رپورٽ موجب نئون ڪوٽ ۾ ايل بي او ڊي سم نالو اوور فلو ٿي ويو، جنهن سبب سم نالي کي ھنڌان ھنڌان روڻيون پئجي ويون ۽ نيڪال واريون گنديون لڙھي ويون. سم نالي کي ڳوٺ سائينداد عالماڻي وٽ روڻيون پئجي ويون، جيڪي ڪنهن به وقت وڌي گهاري ۾ تبديل ٿي سگهن ٿيون. ڍوري ۽ ايل بي او ڊي جي ميلاپ وارو گيٽ ايل بي او ڊي جي پاڻي جي پريشر ۾ اچي ٽٽي ويو. ايل بي او ڊي جو پاڻي نيڪال واري ڍوري ۾ اچڻ سبب ڍوري ۾ پاڻي جو دٻا وڌي ويو. ڍوري ۾ غير معمولي چاڙھه اچڻ سبب ڳوٺ جعفر دل، عبدالمجيد دل، عبدالڪريم خاصخيلي، واتڪل جو گھر، فضل ڀنڀرو، نفيس نگر ۽ طاھر آٿيلو سميت سوين ڳوٺن مان ماڻهن لڏپلاڻ ڪئي. سم نالي کي لڳل روڻيون ٻڌڻ لا ڀرپاسي جا ڳوٺاڻا پنهنجي مدد پاڻ مٽي جا ڪٽا ڀري پنهنجو بچا ڪرڻ لڳا، پر انتظامي عملدار سستي سبب نه پهتا. سم نالي جي گيج 1/2 .11 فوٽ کان به وڌي وئي.
