اسلام آباد : پرڏيهي وزير بلاول ڀٽو زرداري عالمي برادري تي زور ڀريو آهي ته گڏيل قومن جي هنگامي اپيل تي ڀرپور ردعمل ڏيندي ضرورتمند پاڪستانين جي مدد ڪئي وڃي، ڇو ته اسان کي نه رڳو رليف ريسڪيو ڪوششون ڪرڻيون آهن پر علائقن جي بحالي ۽ نئين سر تعمير به ڪرڻي آهي. هڪ ڪلاڪ ۾ گڏيل قومن جي ميمبر ملڪن سميت عالمي ادارن هڪ کرب 30 ارب جمع ڪرايا آهن. پرڏيهي آفيس ۾ تقريب کي خطاب ڪندي بلاول ڀٽو زرداري چيو ته پاڪستان گلوبل وارمنگ سبب سڌي ريت متاثر ٿي رهيو آهي. پاڪستان کي عالمي برادري جي مدد جي ضرورت آهي. هن چيو ته موسمياتي تبديلين سبب پاڪستان ۾ هيٽ ويو رڪارڊ ٽوڙي ڇڏيا. ڪلائوڊ برسٽ ۽ طوفاني برساتن سان ٻوڏ آئي، ٻوڏ سٽيل علائقن جي بحالي ۽ نئين سر تعمير ڪرڻي آهي. سندس چوڻ هو ته ٻوڏ متاثرن تائين کاڌي پيتي جون شيون پهچائڻ ۾ ڏکيائي پيش اچي رهي آهي. امداد تي دوست ملڪن ۽ عالمي برادري جا ٿورائتا آهيون. پاڪستان کي خيمن ۽ مڇر داڻين جي تمام گهڻي ضرورت آهي، گڏيل قومن جي اپيل تي عالمي برادري اڳتي اچي. جڏهن ته اڱاري ڏينهن پرڏيهي وزارت ۾ گڏيل قومن جي ريزيڊنٽ ڪوآرڊينيٽر جولين هارنيس سان گڏيل پريس ڪانفرنس کي خطاب ڪندي پرڏيهي وزير بلاول ڀٽو زرداري چيو آهي ته موجوده ٻوڏ سبب ملڪ ۾ اٽڪل 33 ملين ماڻهو متاثر ٿيا آهن، ان وڏي چئلينج تي ضابطو آڻڻ جي لاءِ حڪومت، عالمي برادري ۽ گڏيل قومن جي ڊونرز ادارن جي گڏيل ڪوششن جي ضرورت آهي. بلاول ڀٽو چيو ته سڄي ملڪ ۾ ريسڪيو، ريليف ۽ بحالي جون سرگرمون زورن تي آهن. ٻوڏ سان تباهي جي شروعاتي جائزي کانپوءِ دنيا، گڏيل قومن ۽ حصيدار ايجنسين کي چئلينج جي شدت کي منهن ڏيڻ جي لاءِ فوري قدمن جي ضرورت آهي. هن چيو ته پاڪستان ۾ ان چوماسي ۾ معمول کان ٽيڻ تي وڌيڪ برساتون ٿيون جنهن جي نتيجي ۾ سنڌ جا 23 ضلعا ۽ بلوچستان، خيبرپختونخوا ۽ ڏکڻ پنجاب جا 30 ضلعا ٻوڏ کان متاثر ٿيا. هن ٻوڏ کان متاثر ماڻهن جي ضرورتن کي پورو ڪرڻ جيل اءِ خيمن ۽ کاڌي پيتي جي شين جي کوٽ جو ذڪر ڪيو ۽ امدادي شين جي فراهمي ۾ شفافيت کي يقيني بڻائڻ جي عزم جو اظهار ڪيو. هن چيو ته ٻوڏ جي پاڻي ۾ ٻڏي ويل هيٺانهين وارن علائقن ۾ پاڻي ڪڍڻ هڪ وڏو چئلينج آهي. جڏهن ته محدود وسيلن جي باوجود ان ڏس ۾ ڪم ڪيو پيو وڃي. هن چيو ته عالمي برادري جي تعاون سان پاڪستان کي ان مشڪل چئلينج تي ضابطو آڻڻ ۾ مدد ملندي. هن امدادي سرگرمين ۾ پاڪستان حڪومت سان تعاون ڪرڻ تي گڏيل قومن ۽ ان جي ادارن جا ٿورا مڃيا. هن امدادي ڪمن ۾ پاڪستاني عوام ۽ سول سوسائٽي پاران مثالي فراخدلي کي پڻ اجاگر ڪيو. پرڏيهي وزير چيو ته ٻوڏ کان بچاءُ ۽ امدادي ڪاررواين جي حوالي سان هڪ ڊگهو رستو باقي آهي. چئلينج کي منهن ڏيڻ جي صلاحيت جي حوالي سان هڪ سوال جي جواب ۾ هن چيو ته وفاقي، صوبائي ۽ عالمي ادارن جي سطح تي گڏيل ڪوششن سان ان مسئلي تي ضابطو آڻي سگهجي ٿو. بلاول ڀٽو چيو ته وزيراعظم شهباز شريف سنڌ جي دوري دوران ڏيڍ ارب رپيا گرانٽ ڏيڻ جو اعلان ڪيو آهي، اها رقم صوبائي حڪومت جي ڪوششن سان پڄاڻي ۾ مددگار ثابت ٿيندي. وفاقي ۽ صوبائي حڪومتن جي وچ ۾ هم آهنگي جي معاملي بابت سوال تي بلاول ڀٽو بينظير انڪم سپورٽ پروگرام سسٽم تحت ڊيٽا جي دستيابي جي افاديت جو حوالو ڏنو جنهن سان امدادي سرگرمين کي انجام ڏيڻ ۾ مدد ملي آهي. پرڏيهي وزير چيو ته هي ٻوڏ جي معاملي تي سياست ڪرڻ جو وقت نه آهي جڏهن ته هن نشاندهي ڪئي ته خيبرپختونخواهه ۾ ٻوڏ کان متاثر ماڻهو مدد جا منتظر آهن جڏهن ته صوبائي حڪومت پنهنجي ليڊر عمران خان جي لاءِ هيليڪاپٽر جي سهولت فراهم ڪرڻ ۾ مصروف رهي. هن چيو ته موجوده ٻوڏ جي مسئلي قومي معيشت بابت مسئلن کي وڌيڪ ڏکيو ڪري ڇڏيو آهي جڏهن ته عوام کي اڳ ۾ ئي مهانگائي جو بار درپيش آهي. بلاول ڀٽو ان اعتماد جو اظهار ڪيو ته اتحادي حڪومت تمام گهڻن چئلينجن جي باوجود هن مشڪل کي موثر انداز ۾ منهن ڏيندي. گڏيل قومن جي ريزيڊنٽ ڪوآرڊينيٽر جنهن سنڌ ۽ بلوچستان جي علائقن جو به دورو ڪيو، سوين ماڻهن جي بي گهر ٿيڻ تي ڳڻتي جو اظهار ڪيو ۽ چيو ته گڏيل قومون ٻوڏ کان متاثر ماڻهن کي مدد فراهم ڪندو. هن چيو ته پاڪستان اڪيلي ان چئلينج تي ضابطو نه ٿو آڻي سگهي ۽ ان سلسلي ۾ عالمي برادري کان تعاون جو مطالبو ڪيو. هن چيو ته موسمياتي تبديلي پاڪستان ۾ “سُپر فلڊز” ۾ ڪردار ادا ڪيو ۽ ان مسئلي کي حل ڪرڻ جي لاءِ هڪ مناسب حڪمت عملي جي ضرورت آهي. جولين هارنيس چيو ته عالمي اپيل جي ذريعي گڏ ٿيندر فنڊز صحت ۽ هنگامي خدمتن ۽ چوپائي مال جي ويڪسينيشن جي مسئلن جو احاطو ڪندا. هن چيو ته گڏيل قومن جي انساني بنيادن تي ريسپانس سهولتون چئلينج کي منهن ڏيڻ جي لاءِ پاڪستان جي قومي صلاحيت ۾ مدد ڪنديون. هن چيو ته گڏيل قومون مقامي عملدارن سان تعاون شروع ڪيو آهي جنهن ۾ لسٻيلا، بلوچستان ۾ پاڻي کانسواءِ چوپائي مال جي ويڪسينيشن جي لاءِ 3 بلين ڊالر جي سپلائي پڻ شامل آهي. هن چيو ته هن انٽرنيشنل ڊيزاسٽر مئنيجمينٽ اٿارٽي جي چيئرمين ۽ پرڏيهي وزارت جي عملدارن سان ملاقاتون ڪيون آهن ۽ وڌيڪ چيو ته جيڪڏهن وڌيڪ امداد جي ضرورت ٿي ته گڏيل قومون ان تي ريسپانس ڏيندو. هن چيو ته ورلڊ فوڊ پروگرام جا ماهر سڀاڻي ٻوڏ متاثر علائقن جو دورو ڪندا ته جيئن ضرورتن جو جائزو وٺي سگهجي. هن چيو ته پاڪستان ۾ ٻوڏ کانپوءِ گڏيل قومن جو مرڪزي هنگامي امدادي پروگرام شروع ٿيو. موسمياتي تبديلين جي حوالي سان هن چيو ته ان سلسلي ۾ پاڪستان جي آواز کي موثر انداز ۾ نه ٻڌو ويو هو ۽ دريائي نظام جي انتظام جي حوالي سان وڌيڪ قدم کڻڻ جي ضرورت آهي.
