سنڌڙي ۾ واهر نه ٿيڻ خلاف چونڊيل نمائندن ۽ ٻوڏ متاثرن جو ڌرڻو

سنڌڙي: سنڌڙي تعلقي جي يوسي 6 جيلاني جي چونڊيل اميدوارن معشوق مڱريو، حاجي محمد درس، مهراڻ مرتضى مڱريو، دودو درس، سڄڻ مڱريو، اڪبر درس ۽ ٻين ٻوڏ متاثرن ڊپٽي ڪمشنر ميرپورخاص، اسسٽنٽ ڪمشنر سنڌڙي ۽ مختيارڪار سنڌڙي خلاف مک چوڪ کان احتجاجي ريلي ڪڍي پريس ڪلب اڳيان مظاهرو ڪري ڌرڻو هڻي سانگھڙ-ميرپورخاص روڊ بلاڪ ڪري ڇڏيو. چونڊيل اميدوارن ۽ ٻوڏ متاثرن چيو ته ڊپٽي ڪمشنر ميرپورخاص، اسسٽنٽ ڪمشنر ۽ مختيارڪار اسان کي مڪمل نظرانداز ڪري ڇڏيو آھي، اسان گندو پاڻي پيئڻ سبب مختلف بيمارين ۾ مبتلا ٿي ويا آهيون، پر ضلعي انتظاميا خاموش تماشائي بڻيل آھي، اسان سان انصاف ڪيو وڃي، ڪرپٽ انتظاميا مڇر مار اسپري ڪرائڻ ۽ مڇردانيون ڏيڻ لا تيار ناهي. هنن مطالبو ڪيو ته جلد مڇرمار اسپري ڪرائي ميڊيڪل ڪئمپون لڳائي راشن، خيما ۽ ٻيو سامان ڏنو وڃي.