سنڌ يونائيٽيڊ پارٽي جي صدر سيد زين شاهه چيو آهي ته ڪراچي ۾ سنڌين کي آباد ڪيو وڃي، افغان پناهگيرن کي فوري طور سندن وطن واپس موڪليو وڃي. آڪٽوبر ۾ حڪومت مخالف تحريڪ شروع ڪئي ويندي. حڪومت جي مجرمانه غفلت سڄي سنڌ ۾ لکين ماڻهن کي بي گهر ۽ بي گهر ڪري ڇڏيو آهي ۽ اهي در در جون ٺوڪرون کائي رهيا آهن. پيپلز پارٽي هڪ معاشي دهشت گرد آهي، جنهن جي مجرمانه ڪاررواين، نااهلي، ڪرپشن ۽ خراب حڪمراني سنڌ کي ويران ۽ برباد ڪري ڇڏيو آهي، زرداري مافيا جي اڳواڻي ۾ ڪرپٽ گروهه 15 سالن کان اسٽيبلشمينٽ جي مدد سان سنڌ تي ڪنٽرول ڪري رهيو آهي. حڪومت 2010ع ۽ 2011ع جي ٻوڏ دوران به ڪرپشن ۽ نااهلي جو مظاهرو ڪيو، 2010ع جي ٻوڏ کانپوءِ قائم ڪيل ڪميشن جي سفارشن تي عمل نه ڪيو ويو. جيڪڏهن فلڊ ڪميشن جي رپورٽ تي عمل ڪيو وڃي ها ته صورتحال ايتري سنگين نه هجي ها. سنڌ جا جيڪي شهر بچيا سي به پرڏيهي امداد جي لالچ ۾ ٻڏي ويا. سنڌ حڪومت شهرين کي تحفظ ڏيڻ ۽ کين بنيادي حق ڏيڻ ۾ مڪمل طور ناڪام ٿي وئي آهي. سنڌ جو وڏو وزير سنڌ جي گورنر کي سفارش ڪري ته سنڌ اسيمبلي کي فوري طور ٽوڙيو وڃي. ان حوالي سان سنڌ جي وڏي وزير کي خط لکيو ويو آهي. اهڙن خيالن جو اظهار هن سومر ڏينهن ڪراچي پريس ڪلب ۾ پريس ڪانفرنس ڪندي ڪيو. ان موقعي تي اعجاز سمون، جگديش آهوجا، خواجا نويد، ايڊووڪيٽ اسد الله شاهه ۽ ٻيا پڻ موجود هئا. سيد زين شاهه چيو ته لکين ماڻهو کليل آسمان هيٺ زندگي گذارڻ تي مجبور آهن. زندگي جو نظام مفلوج ٿي ويو آهي، سنڌ جي 69 لک ايڪڙ زرعي زمين پاڻي هيٺ اچي وئي آهي، جنهن سبب ڪپهه، چانور ۽ سبزي جا فصل تباهه ٿي ويا آهن ۽ چوپايو مال مري وڃڻ سبب سنڌ کي 40 کان 50 ارب رپين جو نقصان پهتو آهي. جاني نقصان، ڳوٺ ۽ گهر ملبي جا ڍير بڻجي ويا آهن. ٻوڏ وارن علائقن ۾ ڪيترائي فوٽ پاڻي بيهجي ويو آهي، جنهن سبب ڊائريا، گيسٽرو، ڊينگي مليريا، ٽائيفائيڊ ۽ ٻيون موذي مرض پکڙجي ويو آهي، ڪراچي سميت سڄي سنڌ ۾ ڊينگي جي صورتحال انتهائي ڳڻتي جوڳي بڻجي وئي آهي. وينٽيليٽرز نه هجڻ ڪري علاج جون بهتر سهولتون نه هجڻ سبب هر روز 50 کان وڌيڪ قيمتي انساني جانيون ضايع ٿي رهيون آهن ۽ ڏينهون ڏينهن ان ۾ خطرناڪ حد تائين اضافو ٿي رهيو آهي، جنهن ڪري سنڌ ۾ وڌيڪ جاني ۽ مالي نقصان جو خدشو آهي. سيد زين شاهه چيو ته سنڌ جي عوام جي وسيع تر مفاد ۾ ايماندار ۽ قابل ماڻهن تي ٻڌل نگران سيٽ اپ قائم ڪيو وڃي. هن چيو ته سنڌ يونائيٽيڊ پارٽي مطالبو ڪري ٿي ته پاڻي جي ماهرن ۽ ايماندار ججن تي مشتمل هڪ آزاد ڪميشن جوڙي وڃي ته جيئن سنڌ ۾ برساتي پاڻي سبب آيل ٻوڏ جي ذميوارن جي نشاندهي ڪري انهن جي خلاف ڪيس داخل ڪري کين سخت سزا ڏني وڃي.
