سجاول جوڻيجو ويجهو يوسي عرضي ڀٽو جي ڳوٺ بھادر ڀنڊ جي برسات متاثرن پ پ اڳواڻن ۽ ايم اين اي آفتاب شعبان ميراڻي ايم پي اي گهنور خان اسراڻ پاران برسات ۽ ٻوڏ متاثرن جي واھر نه ڪرڻ تي مڇرجي شھدادڪوٽ-رتوديرو روڊ تي ڀنڊ چوڪ تي ٽائرن کي باهيون ڏئي رڪاوٽون وجھي ٽريفڪ معطل ڪري ڇڏي. ان موقعي تي پ پ اڳواڻ گدا حسين جلباڻي، دريا خان جلباڻي، عبدالقادر جلباڻي، عبدالحفيظ جلباڻي ۽ ٻين چيو آهي ته ڳوٺن ۾ برساتي پاڻي جي تباھڪارين سبب سخت پريشان آهيون. اسان جي چونڊيل نمائندن ڪا واھر نه ڪئي آهي، گھر ڊھي ويا ۽ فصل ٻڏي ويا. اسان کليل آسمان هيٺان ويٺل آھيون. انتظاميا پاران ڪا واھر نه ڪئي آهي. هنن چيو ته راشن، ٽينٽ ۽ ٻيو سامان من پسند ماڻهن کي ڏنو پيو وڃي. ھنن بلاول ڀٽو ۽ وڏي وزير کان گھر ڪئي ته فورن نوٽيس وٺي يوسي عرضي ڀٽو جي متاثرن جي واھر ڪئي وڃي.
