عمرڪوٽ: عمرڪوٽ ۾ سيرت ڪانفرنس ڪوٺائي ويندي، جنهن ۾ حضرت محمد مصطفيٰ صلي الله عليه وآله وسلم جي يوم ولادت جي حوالي سان نعت پڙھي ويندي ۽ سمورن سرڪاري بلڊنگس تي 12 ربيع الاول جي ڏينهن لائيٽنگ لڳائي وڃي. اھڙن خيالن جو اظهار ڊي سي ايم بي راجا ڌاريجو پاران ڊي سي آفيس جي دربار ھال ۾ 12 ربيع الاول جي حوالي سان ڪيل انتظامن جو جائزو وٺڻ لاءِ مختلف عالمن ۽ سرڪاري عملدارن سان ڪيل اجلاس جي صدارت ڪندي ڪيو. ان موقعي تي ھن سمورن اي سيز کي هدايت ڪندي چيو ته پنھنجن پنھنجن تعلقن اندر 12 ربيع الاول جي حوالي سان گڏجاڻي ڪوٺائي سمورا انتظام مڪمل ڪيا وڃن. ھن سمورن ٽائون ڪميٽيز جي عملدارن کي هدايت ڪئي ته 12 ربيع الاول جي حوالي سان نڪرندڙ ريلين جي روٽ ميپ جي روڊ رستن تي صفائي سٿرائي جا انتظام مڪمل ڪري لائيٽنگ جو بندوبست ڪيو وڃي، اجلاس ۾ فيصلو ڪيو ويو ته 11 ربيع الاول جي ڏينهن تي ضلعي عمرڪوٽ ۾ سيرت ڪانفرنس منعقد ڪرڻ جي لاءِ ھڪ 8 رڪني ڪميٽي جوڙي وڃي. ھن ڊي ايڇ او عمرڪوٽ کي ھدايت ڪئي ته 12 ربيع الاول جي حوالي سان نڪرندڙ ريلين ۾ ايمبولينس سروس کي بحال رکيو وڃي ۽ سمورن اسپتالن ۾ ھائي الرٽ رکيو وڃي.
