بينظير انڪم سپورٽ واري رقم نه ملڻ خلاف ڪالهه سوين عورتن حيدرآباد پريس ڪلب سامهون معصوم ٻارڙن سميت مظاھرو ڪيو. هنن دانهيو ته اسين بيواهه ۽ يتيم عورتون آهيون، اسان کي بينظير انڪم سپورٽ واري رقم ملندي هئي پر برسات کانپوءِ پئسا اچڻ بند ٿي ويا آهن. هنن چيو ته هر روز سينٽرن جا چڪر ڪاٽي رهيا آهيون پر اتي جو عملو ڌڪا ڏئي ٻاهر ڪڍي ٿو ڇڏي. هنن چيو ته وڌندڙ مهانگائي ۾ جيئڻ ڏکيو ٿي ويو آهي. اٽو 120 روپيا ڪلو ٿي ويو آهي. پئسا نه ملڻ ڪري بکون ڪاٽڻ تي مجبور ٿي ويا آهيون. هنن اپيل ڪئي ته بينظير انڪم سپورٽ جا پئسا جاري ڪري بيواهه ۽ يتيم عورتن سان انصاف ڪيو وڃي.
