پيپلز پارٽي اهم اداري جي سربراهھ ۽ پارٽي پاليسي خلاف بيان ڏيڻ تي سينيئر اڳواڻ بئريسٽر اعتزاز احسن جي سينٽرل ايگزيڪيوٽو ڪميٽي (سي اي سي) ڪميٽي ۽ بنيادي ميمبر شپ معطل ڪري کيس پارٽي مان نيڪالي ڏيڻ جو فيصلو ڪري ورتو آهي. ذريعن موجب پيپلز پارٽي جي چيئرمين بلاول ڀٽو زرداري ۽ شريڪ چيئرمين آصف علي زرداري کان منظوري وٺڻ بعد هاڻي پنجاب ايگزيڪيوٽو ڪميٽي پارٽي جي جنرل سيڪريٽري ڏانهن سفارشون موڪليندي. ذريعن موجب ايگزيڪيوٽو ڪميٽي جي اجلاس ۾ اعتزاز احسن جي بيانن خلاف ٺهراءُ منظور ڪيو ويندو، جڏهن ته کيس پنجاب ايگزيڪيوٽو ڪميٽي پاران شوڪاز نوٽيس پڻ اماڻيو ويندو. اعتزاز احسن کي انتظامي طور فارغ ڪرڻ لا پنجاب جي صوبائي قيادت کي ٽاسڪ ڏنو ويو، جڏهن ته پارٽي مان خارج ڪرڻ لا آصف علي زرداري ۽ بلاول ڀٽو زرداري کان به حتمي منظوري ورتي وئي آهي. ذريعن موجب اعتزاز احسن خلاف ڪارروائي جو فيصلو آصف زرداري جي هدايت تي ڪيو ويو آهي.
