ڪراچي: ڪراچي جي گلبرگ بلاڪ 12 ۾ بنگلي مان ڌاڙو هڻندڙ 3 ڦورو پوليس سان مقابلي ۾ مارجي ويا، جڏهن ته چوٿون ساٿي زخمي حالت ۾ فرار ٿي ويو. ان سلسلي ۾ پوليس دعويٰ ڪئي آهي ته ڦورو هڪ بنگلي ۾ داخل ٿي ڌاڙي جي ڪوشش ڪري رهيا هئا ته پاڙيوارن جي اطلاع تي موقعي تي پهتاسين. جوابدارن فرار ٿيڻ لا بنگلي جي هڪ عورت ۽ هڪ مرد کي يرغمال بڻائي ٻاهر نڪري آيا پر پوليس اهلڪارن وڏي مهارت ۽ هوشياريءَ سان جوابدارن کي گهيري ۾ آڻي ڇڏيو، جوابدارن جو تعلق سلور ڪرولا گينگ سان آهي، واقعي جي سي سي ٽي وي فوٽيج به سامهون اچي وئي آهي.
تفصيل موجب ڪالهه صبح گلبرگ چورنگي وٽ گلبرگ بلاڪ 12 وٽ 4 جوابدار سلور رنگ جي ڪار ۾ پهتا، هڪ جوابدار ڪار ۾ ويٺو رهيو، جڏهن ته 3 جوابدار هڪ بنگلي ۾ داخل ٿي ويا، ڦورن ڦرلٽ جي ڪوشش ڪئي پئي ته ون فائيو پوليس کي ڏوهارين جي موجودگي جو اطلاع ڏنو ويو. پوليس موجب جوابدارن جي فائرنگ بعد جوابي فائرنگ ۾ 3 ڄڻا مارجي ويا، ڄاڻايل جوابدارن 7 نومبر تي گلشن اقبال واري علائقي مان به ڦر ڪئي هئي، جنهن جا سي سي ٽي فوٽيجز سامهون آيا آهن.
