اسلام ڪوٽ شهر جي ٽيچرز ڪالوني ۾ ڏيپلو واسي 35 ورهين جي نوجوان جهامن پٽ سوجو ميگهواڙ جو هڪ گهر جي ڪمري مان ٽنگيل لاش مليو آهي. پاڙيسرين لاش ڏسي پوليس کي اطلاع ڪيو، جنهن بعد لاش کي پوسٽ مارٽم لا اسلام ڪوٽ اسپتال پهچائي ضروري ڪارروائي بعد وارثن حوالي ڪيو ويو. ٻڌايو پيو وڃي ته فوتي نوجوان جهامن ميگهواڙ ڏيپلو تعلقي جي ڳوٺ ڪوئنرل جو رهواسي هو ۽ اسلام ڪوٽ ۾ دڪان هلائيندو هو. ذريعن موجب ڪجھه ڏينهن اڳ فوتي نوجوان جي ڀيڻ سان ڳوٺ ۾ بااثر جوابدارن زيادتي ڪئي هئي ۽ ڇوڪري ڪجھه ڏينهن اڳ آپگهات ڪيو هو. نوجوان جهامن تي نامزد بااثر جوابدار ڪيس تان هٿ کڻڻ لاءِ مبينا طور دٻا وجهي رهيا هئا. ذريعن موجب جهامن ميگهواڙ وياج تي ڪجھه قرض پڻ کنيو هو، جنهن جي واپسي لاءِ وياجي کيس تنگ ڪندا رهندا هئا جنهن سبب هو اڪثر پريشان رهندو هو.
