ٺل ۾ نين تڪبندين تان پ پ اڳواڻن ۾ اختلاف سامهون اچي ويا. ٺل ۾ پريس ڪانفرنس ڪندي ايم پي اي ڊاڪٽر سهراب سرڪي جي ڀاءُ ذوالفقار علي سرڪي چيو ته ٺل تعلقي ۾ نيون تڪبنديون عوام جي مفادن ۾ ناهن، جنهن ڪري اسان اعتراض وارڻ سان گڏ ڪورٽ جو در کڙڪائينداسين. هن چيو ته تازو پ پ ۾ شامل ٿيندڙ مير طاهر حسين کوسي جي چوڻ تي تڪبنديون ٺاهيون ويون آهن، جنهن تي اعتراض آهي ۽ اسان انهن تڪبندين کي مڪمل طور تي رد ڪريون ٿا. هن چيو ته نين تڪبندين جي دانهن پارٽي قيادت کي ڏيندس ته ان ۾ اسانجي اتحادين کي نقصان ٿيو آهي، پارٽي انهي معاملي تي سنجيدگي سان سوچيندي. هن چيو ته اسان انهن تڪبندين سان به اليڪشن وڙهي کٽي ڏيکارينداسين. هنن چيو ته اسان ۽ اسانجي اتحادين کي ڀت سان لڳايو ويو آهي، هنن تڪبندين ۾ ايم پي اي ڊاڪٽر سهراب سرڪي کي به اعتماد ۾ نه ورتو ويو آهي. هن چيو ته سرڪي برادري جي ٽن يوسيز کي مڪمل ختم ڪيو ويو آهي. جڏهن ته 10-10 ڪلوميٽرن تي ديهون جوڙيون ويون آهن. هن چيو ته ميونسپل ڪاميٽي ٺل جا تڪ به غلط ٺاهيا ويا آهن جنهن سان عوام کي نقصان ٿيندو.
