لاڙڪاڻي جي مراد واهڻ جي رهواسين بااثر مائٽن جي مبينا زيادتين خلاف پريس ڪلب اڳيان احتجاجي مظاهرو ڪيو. ان موقعي تي ڪٻاڙي دڪاندار حبدار سومري پنهنجي ڀائرن ۽ پاڙيسرين سان گڏجي دانهيو ته منهنجو ڀاءُ منظور حسين سومرو چانڊڪا اسپتال ۾ مالهي هو، جيڪو اڍائي مهينا اڳ رٽائرڊ ٿيڻ بعد فوت ٿي ويو. هن الزام لڳايو ته ڀاءُ جي فوت ٿيڻ جو سندس گهرواري ثمينه ان جي ڀائرن حاڪم ۽ منير وارن اسان کي اطلاع نه ڏنو ۽ لاش دفنائي بعد ۾ ٻڌايو ويو، انهي ڪري خدشو آهي ته ڀاڄائي پنهنجي ڀائرن سان گڏجي ڀاءُ کي قتل ڪري ڇڏيو آهي ۽ اهي ڀاءُ جي ملڪيت تي قبضو ڪرڻ چاهين ٿا جن خلاف پوليس کي شڪايت ڪئي پر پوليس ڪارروائي لاءِ تيار ناهي. هن لاڙڪاڻي جي ڊي آءِ جي ۽ ايس ايس پي کي اپيل ڪئي ته ڀاءُ واري واقعي جي جاچ ڪري ڀاڄائي ۽ ان جي ڀائرن خلاف ڪارروائي ڪئي وڃي.
