روھڙي مان ڪرائي تي رڪشا ڊرائيور نوجوان شھزادو جتوئي کي ڪنڌرا ڀرسان ڳوٺ ابيلو ۾ وٺي وڃي هٿياربندن گوليون هڻي قتل ڪري ڇڏيو. اهڙي اطلاع باوجود پوليس بروقت نه پهتي، جنهن کانپو وارثن مقتول جو لاش روھڙي ڀرسان نيشنل ھاءِ وي تي رکي ڌرڻو ھنيو. جتي وڏي انگ ۾ شھري شامل ٿي ويا. مقتول جي وارثن چيو ته اسان جو گوليون لڳل نوجوان پاڻ زخمي حالت ۾ رڪشا هلائي اسپتال پهتو پر پوليس ۽ اسپتال انتظاميا جي لاپرواهي ۽ سنگين نااھلي سبب نوجوان زندگي جي جنگ هارائي ويو. ڪنڌرا پوليس بروقت پھچي زخمي کي کڻائي اسپتال پهچائي ھا ۽ اسپتال انتظاميا بروقت سندس صحيح علاج ڪري ھا ته زندگي بچي وڃي ھا پر پوليس ۽ اسپتال انتظاميا لاپرواهي جو مظاهرو ڪيو، جنهن ڪري ھو حياتي وڃائي ويٺو. احتجاج دوران ڊي ايس پي روهڙي حضور بخش سولنگي ۽ ايس ايڇ او ياسر کوسو پهچي ڳالهيون ڪري قاتلن جي گرفتاري، پوليس ۽ اسپتال انتظاميا خلاف ڪارروائي جي خاطري ڪرائي تي ڌرڻو ختم ڪري ڇڏيو.
