لاڙڪاڻي ۾ اسسٽنٽ ڪمشنر احمد علي سومرو زرعي عملدارن سان گڏجي زرعي ڀاڻ جو ذخيرو ڪندڙ خانگي ڪمپني ايف ايف سي ويئر هائوس ۽ اينگرو ويئر هائوس تي ڪارروائي ڪندي هزارن جي تعداد ۾ ڀاڻ جون ٻوريون هٿ ڪري ورتيون. ان موقعي تي اي سي لاڙڪاڻو احمد علي سومرو چيو ته ڊي سي لاڙڪاڻو جي خاص هدايتن تي زرعي ڀاڻ جو ذخيرو ڪري بليڪ تي وڪرو ڪندڙ خلاف ڪارروائي ڪئي آهي، ڪارروائي دوران اينگرو ويئر هائوس تان 30 هزار ٻوريون يوريا ڀاڻ جون مليون آهن. جڏهن ته ايف ايف سي ويئر هائوس تان 1300 ٻوريون يوريا ڀاڻ جون هٿ ڪيون آهن. هٿ ڪيل ڀاڻ کي هن وقت سيل ڪيو ويو آهي. هن چيو ته اينگرو ۽ ايف ايف سي ڪمپني جا عملدار ذخيرو ڪيل ڀاڻ غريب هارين ۽ آبادگارن کي مهانگي اگھه تي وڪرو ڪري ڏين ها پر ڪارروائي ڪري اهو ڀاڻ اسان پنهنجي تحويل ۾ وٺي ڇڏيو آهي، جيڪو ڊي سي جي اڳواڻي ۾ هارين کي سستي اگھه تي وڪرو ڪيو ويندو.
