لاڙڪاڻي ۾ باقراڻي جي ڳوٺ مهراب ڪلهوڙو واسي پيرسن پورهيت زمين تي مبينا قبضو ٿيڻ خلاف پريس ڪلب اڳيان احتجاج ڪيو. ان موقعي تي پيرسن ممتاز عباسي دانهيندي چيو ته اسان جي ساڍا 10 جريب زرعي زمين تي منهنجي ماٽيلي بااثر ڀاءُ پريل عباسي ۽ غلام مصطفيٰ ملي ڀڳت ڪري کاتا تبديل ڪرائي زمين تي 30 سالن کان قبضو ڪري ڇڏيو آهي، جڏهن ته بااثر ڀاءُ پريل عباسي ڳوٺ واري گهر تي قبضو ڪيو آهي. اهڙي دانهن ضلعي انتظاميا، پوليس عملدارن سميت معززن کي ڏني آهي. هن اختيارين کي اپيل ڪئي ته نوٽيس وٺي ماٽيلي بااثر ڀائرن خلاف ڪارروائي ڪري زمين تي ٿيل قبضو ختم ڪرائي انصاف ڪيو وڃي.
