لاڙڪاڻي ۾ تعلقي باقراڻي جي ڳوٺ اسحاق کونهارو جي رهواسي پيرسن 14 سال اڳ مبينا قتل ٿيل نوجوان پٽ جي قتل ڪيس ۾ ملوث جوابدار گرفتار نه ٿيڻ خلاف پريس ڪلب اڳيان احتجاج ڪيو. ان موقعي تي پيرسن علي محمد ابڙو دانهيندي الزام لڳايو ته سال 2007ع دوران نوجوان پٽ اڪبر علي ابڙو کي سڱاوتي تان جوابدارن الهه رکيو موجائي، رزاق موجائي ۽ ٻين قتل ڪري ڇڏيو هو، واقعي جو ڪيس باقراڻي ٿاڻي تي داخل هجڻ باوجود پوليس هن وقت تائين جوابدارن کي گرفتار نه ڪري سگهي آهي، جيڪا وڏي ناانصافي آهي. هن چيو ته منهنجي ڳڀرو پٽ کي بيگناهه قتل ڪري وڏو ظلم ڪيو ويو، جنهن جي خون سان انصاف لاءِ گذريل ڪيترن ئي سالن کان مسلسل احتجاج ڪري رهيو آهيان، پر افسوس جو ڪنهن به نوٽيس ناهي ورتو، جنهن ڪري خدشو آهي ته پٽ جو خون لڙهي ويندو. هن وس وارن کي اپيل ڪئي ته پٽ جي قاتلن کي گرفتار ڪري سندس خون سان انصاف ڪيو وڃي.
