ڪراچي جي علائقي جيل چورنگي ڀرسان سپر اسٽور جي بيسمينٽ ۾ باهه لڳڻ سبب هڪ ڄڻو فوت ٿي ويو. جيل چورنگي ڀرسان رهائشي عمارت ۾ موجود سپر اسٽور جي ويئر هائوس ۾ صبح تقريبن 11 وڳي باهه لڳي، باهه وسائڻ جو عمل ڪيترن ئي ڪلاڪ جاري رهيو ۽ فائر برگيڊ جون 12 کان وڌيڪ گاڏيون باهه وسائڻ جي ڪوشش ڪري رهيون هيون. ريسڪيو اختيارين موجب واقعي ۾ هڪ شخص فوت ٿيو آهي، جيڪو سپر اسٽور جي اندر ڦاسي پيو هو. هوڏانهن واقعي ۾ سپر اسٽور عملي جي غفلت سامهون آئي آهي، اکين ڏٺن شاهدن موجب عملي پنهنجي مدد پاڻ تحت باهه وسائڻ جي ڪوشش نه ڪئي، باهه وسائڻ جي ڪوشش بدران عملو ٻاهر نڪري بيهي رهيو. فائر برگيڊ اختيارين جو به چوڻ آهي ته باهه وسائڻ وارن اوزارن جي مدد سان باهه تي ضابطو اچي پئي سگهيو.
